СҚО-ға қанша адам қоныс аударды

Жыл басынан бері Қазақстанда 2 мыңнан астам адам ерікті түрде еңбек ресурстары тапшы өңірлерге қоныс аударуға шешім қабылдады. Бұл үшін оларға мемлекет тарапынан қаржылай қолдау көрсетілді, деп хабарлайды QZ NEWS NUR.KZ порталына сілтеме жасап.

Қазақстанда еңбек күші жетіспейтін аймақтарға көшуге арналған арнайы бағдарлама бар. Осы бағдарлама аясында қоныс аударуға ниет білдірген азаматтарға мемлекет субсидия түрінде қолдау көрсетеді.

ҚР Еңбек және халықты әлеуметтік қорғау министрлігінің мәліметінше, 2025 жылғы 1 шілдедегі жағдай бойынша қоныс аударуға 2 202 адам шешім қабылдаған:

1 111 – ішкі қоныс аудару

1 091 – қандас (тарихи отанына шетелден оралған этникалық қазақтар).

Ең көп қоныс аударушыны қабылдаған өңір – Павлодар облысы (672 адам). Одан кейінгі орындарда:

Солтүстік Қазақстан облысы – 532 адам,

Қостанай облысы – 330 адам,

Ақмола облысы – 215 адам.

Жалпы, 2025 жылдың соңына дейін 9 653 адамды қоныстандыру жоспарланып отыр, оның ішінде 2 309 квота қандастарға бөлінген.

Қоныс аударған азаматтар мемлекеттен келесі қолдауға сене алады:

Көшуге арналған бір реттік субсидия – әр отбасы мүшесіне 70 АЕК (2025 жылы 275 240 теңге);

Тұрғын үй жалдау және коммуналдық төлемдерге арналған субсидия – отбасыға 15-тен 30 АЕК-ке дейін (58 980 – 117 960 теңге);

Экономикалық мобильдік сертификаты – баспана сатып алуға берілетін қолдау;

Жұмысқа орналасуға немесе бизнес ашуға жәрдемдесу;

Қысқа мерзімді оқыту курстарына жіберу.

Экономикалық мобильдік сертификат баспана құнының 50%-ына дейін жаба алады. Бірақ оның шекті сомасы – 1 160 АЕК, яғни 2025 жылы 4 561 120 теңге. Бұл – мемлекет тарапынан үй сатып алуға берілетін ең жоғарғы мөлшер.

Айта кетейік, қоныс аударушыларға көмек көрсететін жұмыс берушілерге де 400 АЕК (2025 жылы 1 572 800 теңге) көлемінде субсидия қарастырылған.

Сонымен қатар, соңғы уақытта қоныс аудару ережелері күшейтілді. Бұл – жемқорлық тәуекелдері мен бюджет қаражатын ұрлаудың алдын алу мақсатында қабылданған шара.