Асқап Сәкіпкереев: Ұлттық құрылтай бастамалары СҚО-дағы мемлекеттік басқаруды жаңғыртудың бағытын айқындайды
Елдегі жоғары заң шығарушы билік жүйесінің құрылымына қатысты конституциялық өзгерістер мемлекеттік сектордағы ең өзекті тақырыптардың біріне айналды, деп хабарлайды QZ NEWS тілшісі.
Бұл өзгерістердің маңызы мен олардың өңірдің қаржы жүйесіне ықпалы туралы Солтүстік Қазақстан облысы бойынша Мемлекеттік қазынашылық департаментінің басшысы Асқап Сәкіпкереев пікір білдірді. Оның айтуынша, елдің жоғары өкілді және заң шығарушы органын институционалдық тұрғыдан жаңғырту мемлекеттік басқару жүйесін жетілдірудегі маңызды қадам болып табылады.
«Елдің жоғары өкілді және заң шығарушы органын институционалдық трансформациялау мемлекеттік басқарудың жаңа әрі серпінді моделіне көшуді білдіреді. Бұл өзгерістер өңірлердің әлеуметтік-экономикалық дамуын жеделдету қажеттілігіне уақытылы жауап болып отыр», – деді департамент басшысы.
Реформаның қаржы-экономикалық сала үшін маңызы ерекше. Ең алдымен, бұл бюджет үдерістерін жеделдетуге, әкімшілік кедергілерді азайтуға және мемлекеттік институттар арасындағы өзара іс-қимылдың тиімділігін арттыруға бағытталған.
Асқап Сәкіпкереевтің айтуынша, бюджеттік шешімдерді жедел қабылдау жергілікті бюджеттерге қазынашылық қызмет көрсетудің тиімділігін арттырады. Бұл Солтүстік Қазақстан облысының тұрғындары алдындағы мемлекеттік міндеттерді жүзеге асыруда бюджеттік бағдарламалар әкімшілері үшін аса маңызды.
Жаңа модель аясында бюджет қаражатының пайдаланылуын бақылауды күшейтуге және мемлекеттік органдар қызметінің ашықтығын арттыруға да ерекше назар аударылып отыр.
«Қазынашылықтың аумақтық бөлімшелері үшін бұл қаржылық бақылау тетіктерін бюджет қаражатын тиімді пайдалану және бюджет үдерістерінің ашықтығын қамтамасыз ету жөніндегі мемлекеттік міндеттермен бұрынғыдан да тығыз үйлестіруді білдіреді», – деп атап өтті ол.
Департамент басшысының пікірінше, жүргізіліп жатқан өзгерістердің тағы бір маңызды артықшылығы – өңірлік саясатты қалыптастыру кезінде аймақтардың ерекшеліктерін неғұрлым толық ескеруге мүмкіндік беруі. Шекара маңындағы өңір саналатын Солтүстік Қазақстан облысы үшін бұл әлеуметтік-экономикалық даму тетіктерін нақтырақ қалыптастыруға ықпал етуі мүмкін.
Сонымен қатар облыстың қаржы блогы жүргізіліп жатқан реформалар аясында қаржы жүйесінің тұрақты жұмысын қамтамасыз етуге күш салатын болады.
«Біздің басты міндетіміз – облыстың жергілікті бюджеттеріне қазынашылық қызмет көрсету рәсімдерінің жедел орындалуын қамтамасыз ету. Жаңа жағдайлар еңбек тәртібінің жоғары деңгейін және бюджет процесіне қатысушы әрбір адамның жеке жауапкершілігін талап етеді», – деп түйіндеді Асқап Сәкіпкереев.