AI және «Адал Азамат»: 2025-2026 оқу жылында СҚО оқушыларын қандай жаңашылдықтар күтіп тұр
Жаңа оқу жылы қазақстандық мектептерге оқу процесіне де, сыныптан тыс өмірге де қатысты маңызды өзгерістер әкелмек. Бұл туралы СҚО Өңірлік коммуникациялар қызметінде өткен брифингте білім басқармасы басшысының орынбасары Татьяна Протопопова толығырақ айтып берді, деп хабарлайды QZ NEWS.
2025-2026 оқу жылынан бастап «Цифрлық сауаттылық» және «Информатика» пәндеріне жасанды интеллект элементтері енгізіле бастайды.
«Орта білім беру жүйесінде AI қолданудың этикалық стандарттары бекітілді. Оқушыларға арналған Day of AI онлайн-курстары әзірленді, ал педагогтар үшін арнайы біліктілікті арттыру бағдарламалары қарастырылған. Сондай-ақ кезең-кезеңімен AI-Kitap білім беру платформасын енгізу жоспарлануда», – деді Татьяна Протопопова.
Сонымен қатар барлық мектептерде «Адал Азамат» бағдарламасы енгізіледі. Оның мақсаты – оқушыларды адалдыққа, еңбексүйгіштікке, отансүйгіштікке тәрбиелеу, сондай-ақ мектеп пен қоғам арасындағы байланысты нығайту.
«Мектеп жұмысында ата-аналар комитеттері үлкен рөл атқарады. Олар ата-аналар мен мектеп арасындағы байланыстырушы буын ретінде қызмет етіп, мектепті басқаруға, балалардың құқықтарын қорғауға, оқу процесін және мектеп іс-шараларын ұйымдастыруға қатысады. Олардың рөлі – білім сапасын арттыруға, отбасы мен мектеп арасындағы байланысты күшейтуге және мектеп өмірінде туындайтын түрлі мәселелерді шешуге көмектесу. Маңызды бағыт – ата-аналар комитеттерінің жұмысын трансформациялау арқылы ата-аналар қауымдастығы мен білім беру ұйымдарының өзара іс-қимылын дамыту болады», – деп қорытындылады СҚО білім басқармасы басшысының орынбасары.