Кредиттік демалыс пен тегін жоғары білім: СҚО-дан әскерге шақырылушыларға қандай қолдау көрсетіледі

2 қыркүйектен бастап Солтүстік Қазақстан облысында, еліміздің барлық өңірінде сияқты, күзгі әскерге шақыру науқаны басталды. Ол 2025 жылдың желтоқсан айының соңына дейін жалғасады. Осы уақыт аралығында біздің өңірден шамамен 500 жас жігіт мерзімді әскери қызметке жіберіледі, деп хабарлайды QZ NEWS.

СҚО Қорғаныс істері жөніндегі департаментінің мәліметінше, Президент Жарлығына сәйкес, әскерге шақыруға 18 бен 27 жас аралығындағы, кейінге қалдыру немесе босатылу құқығы жоқ ер азаматтар жатады. Қызмет мерзімі – 12 ай.

«Шақыру науқанын өткізу үшін өңірде 14 шақыру және медициналық комиссиясы жұмысын бастады: оның 12-сі аудандарда, біреуі қалалық және біреуі облыстық. Шақырылушыларға ыңғайлы болу үшін биылдан бастап дәстүрлі шақыру қағаздарымен қатар SMS-хабарламалар да жіберілуде. Олар ресми құжатқа теңестіріледі. Хабарлама белгіленген күнге үш күн қалғанда келеді, ал шақырылушы медициналық тексеруден өту үшін әскери комиссариатқа келуге міндетті. Сондай-ақ әскерден жалтарғандарға әкімшілік және қылмыстық жауапкершілік қарастырылғанын еске саламыз», – деп атап өтті СҚО Қорғаныс істері жөніндегі департаментінде.

Әскери қызметтің тартымдылығын арттыру үшін Қорғаныс министрлігі бірнеше қолдау шараларын енгізді:

• «Кредиттік демалыс»: әскери қызметшілерге қызмет мерзімі аяқталғанша банк несиелері мен микрокредиттерді төлеуді кейінге қалдыру мүмкіндігі беріледі.
• «Срочник 2.0» жобасы: мерзімді әскери қызметін абыроймен өтеген жас жігіттер еліміздегі 70-тен астам жоғары оқу орнының бірінде тегін жоғары білім алу құқығына ие болады.

СҚО-дан әскерге шақырылғандар ҚР Конституциялық борышын орындап, елді қорғау үшін Шекара қызметіне, Қарулы күштерге, Мемлекеттік күзет қызметіне және ТЖМ бөлімшелеріне жіберіледі.