Мониторинг тобы Имантау-Шалқар курорттық аймағының туристік маусымның қызған шағына дайындығын тексерді
Солтүстік Қазақстан облысында Имантау-Шалқар курорттық аймағында қауіпсіз әрі жайлы демалысты қамтамасыз ету бағытындағы жүйелі жұмыстар жалғасуда, деп хабарлайды QZ NEWS тілшісі.
Туристер ең көп келетін кезеңде мұнда апта сайын тұрақты мониторингтік топ жұмыс істейді. Оның құрамына кәсіпкерлік және индустриялық-инновациялық даму басқармасының, Төтенше жағдайлар департаментінің, Санитариялық-эпидемиологиялық бақылау департаментінің және «Көкшетау» мемлекеттік ұлттық табиғи паркінің өкілдері кіреді.
Мамандар ұлттық табиғи парктің бақылау-өткізу бекеттерінің жұмысына ерекше назар аударуда. Мұнда өткізу қабілетіне тұрақты мониторинг жүргізіліп, күту уақытын қысқарту бойынша шаралар қабылдануда. Кіру орындарында төлем жасау тәртібі түсіндірілген ақпараттық баннерлер орнатылған. Демалушылардың басым бөлігі ұлттық паркке кіру ақысын Kaspi Bank және Halyk Bank мобильді қосымшалары арқылы алдын ала төлейді.
Туристерге қолайлы жағдай жасау үшін бақылау-өткізу бекеттерінде тегін Wi-Fi тарататын модемдердің байланыс сигналы күшейтілді. Сонымен қатар еріктілер келушілерге электрондық төлемді жылдам рәсімдеуге көмектесуде.
«Біздің міндетіміз – қонақтардың демалысы ұлттық паркке кірген сәттен бастап жайлы басталуы. Алдын ала онлайн төлем жасау, интернет байланысын күшейту және еріктілердің көмегі арқылы бақылау-өткізу бекеттерінен өту уақыты айтарлықтай қысқарды. Тіпті ең көп жүктеме кезінде де бекеттер штаттық режимде жұмыс істеп тұр», – деді мониторингтік топ мүшелері.
Орта есеппен әр үш минут сайын шлагбаумдар арқылы шамамен 15 автокөлік өтеді. Бұл ең қарбалас күндердің өзінде кіру бекеттерінің өткізу қабілетінің жоғары екенін көрсетеді. Сонымен бірге демалушыларға ұлттық парк аумағына кіру тек қолма-қол ақшасыз төлем арқылы жүзеге асырылатыны ескертіледі.
Бақылау-өткізу бекеттерінен бөлек, мониторингтік топ демалыс орындарын аралап тексеруде. Мамандар қауіпсіздік талаптарының сақталуын, материалдық-техникалық базаның жағдайын және туристердің жайлы демалуына жасалған жағдайларды бағалайды.
Айта кетейік, туристік нысандардың иелері инфрақұрылымды дамытуға инвестиция салуды жалғастырып, орналастыру орындарының санын көбейтіп, аумақтарды абаттандырып, қызмет көрсету сапасын арттыруда.
Маңызды бағыттардың бірі – туристік полицияның екі модульдік бекетін салу. Қазіргі уақытта іргетастары құйылып, металл конструкцияларын құрастыру жұмыстары жүргізілуде. Жаңа бекеттер Имантау және Шалқар көлдерінің маңында орналасады.
«Туристік инфрақұрылымды дамыту қауіпсіздікті қамтамасыз етусіз мүмкін емес. Туристік полицияның жаңа бекеттері өңір тұрғындары мен қонақтарының демалысын бұрынғыдан да қауіпсіз әрі жайлы етіп, кез келген жағдайға жедел әрекет етуге мүмкіндік береді», – деп атап өтті мониторингтік топ мүшелері.
Қабылданып жатқан кешенді шаралар Имантау-Шалқар курорттық аймағын туристік саланың заманауи талаптарына сәйкестендіріп, жыл сайын еліміздің түкпір-түкпірінен келетін демалушылар санын арттыруға бағытталған.