Петропавлда өрт сөндірушілер әйелді құтқарып, жарылыс қаупінің алдын алды

Петропавлда Островский көшесіндегі жеке тұрғын үйден шыққан өрт ауыр зардаптарға әкеп соғуы мүмкін еді, деп хабарлайды QZ NEWS тілшісі.

Өрт болған сәтте үйдің ішінде әйел адам болған. Өрт сөндірушілер оны үйден тауып, таза ауаға алып шықты. Құтқарылған әйелдің жағдайы қанағаттанарлық болды. Ол ауруханаға жатудан бас тартты.

Өртті сөндіру кезінде газ баллондары ерекше қауіп төндірді. Үйдің ішінде үш газ баллоны болған. Өрт сөндірушілер оларды қауіпті аймақтан дер кезінде алып шықты. Өрттің әсерінен баллондардың қызуы ауыр зардаптарға әкелуі мүмкін еді.

«Басты міндет – өрттің таралуына жол бермеу және адамдардың қауіпсіздігін қамтамасыз ету болды. Газ баллондары үйден жедел шығарылды. Сондай-ақ өрттің көршілес құрылыстарға таралу қаупі жойылды», – деп хабарлады құтқарушылар.

Өрт сөндірушілердің жұмысына жеке үйлердің бір-біріне жақын орналасуы қиындық туғызды. Өрт көршілес үйге таралуы мүмкін еді. Алайда бөлімшелердің жедел әрекет етуінің арқасында өрттің таралуына жол берілмеді.

Алдын ала мәлімет бойынша, өрттің шығуына пешті пайдалану кезінде өрт қауіпсіздігі талаптарының сақталмауы себеп болған.