Петропавлдық 64 жастағы тұрғынға ми ісігін алып тастау бойынша ота МӘМС аясында тегін жасалды

Петропавлдағы көпбейінді облыстық аурухананың нейрохирургия бөлімінде 64 жастағы ер адамға миындағы ісікті алып тастау бойынша күрделі ота сәтті жасалды. Науқас Анатолий Черясов ұзақ уақыт бойы бас ауруына шағымданып келген. Соңғы кездері оған сөйлеу, есте сақтау және оқи алу қабілетінің күрт нашарлауы қосылған, деп хабарлайды QZ NEWS.

Анатолийдің айтуынша, бас ауруы шамамен бір жыл бойы мазалап келген, алайда ол бұл белгілерге аса мән бермей, ауруды өз бетінше басуға тырысқан. Алайда соңғы бір ай ішінде жағдайы күрт нашарлаған: мәтін оқи алмау, сандарды санау қиынға соғып сөйлеу қабілетінің бұзылуы (амнестикалық афазия), сондай-ақ жақында болған оқиғаларды есінде сақтай алмау секілді белгілер пайда болған.

Күйінің нашарлауына байланысты жедел медициналық көмекке жүгінуге мәжбүр болған. Нейрохирургтың тексеруінен кейін және көпқабатты спиральды компьютерлік томография (КТ) жүргізілген соң, оның миының сол жақ бөлігінде супратенториальды менингиома анықталған. Ісіктің айналасында қатты ісіну және ми құрылымдарының ығысуы байқалған.

Контрасты МРТ зерттеуі диагнозды нақтылап, жаңа түзілістің нақты көлемін көрсетті: 6,5х5,3х4,5 см. Барлық қажетті дайындық шараларынан кейін науқас операцияға жіберілді.

Ісікті алып тастау бойынша хирургиялық араласу алты сағатқа созылды. Қабыршақ-костопластикалық трепанация мен микрохирургиялық ісік жою отасы жасалды. Отадан кейін науқастың жағдайы тұрақты, оң өзгерістер байқалуда. Неврологиялық белгілердің кейбірі отадан кейінгі үшінші күні-ақ бәсеңдеген.

Қазіргі таңда Анатолий Черясов нейрохирургия бөлімінде емін жалғастыруда. Мұндай күрделі ота бағасы 10–15 миллион теңге аралығында болса, Міндетті әлеуметтік медициналық сақтандыру (МӘМС) жүйесінің арқасында операция мен емделу шығындары науқас үшін тегін болды.