Қытайлық ірі корпорация СҚО-да элеватор мен құрама жем зауытын салуды жоспарлап отыр
Солтүстік Қазақстан облысында ауқымды жаңа инвестициялық жобалар жүзеге асырылмақ. Аймақ әкімі Ғауез Нұрмұхамбетов Қытайдың «Beijing Guancheng Shenghua Investment» компаниясының басқарма төрағасы Ма Юнхумен кездесу өткізіп, өңірде маңызды инвестициялық жобаларды іске асыру перспективаларын талқылады, деп хабарлайды QZ News.
Өнеркәсіптік және тұрғын үй нысандарын салумен, сондай-ақ ауыл шаруашылығын дамытумен айналысатын қытайлық корпорация Солтүстік Қазақстан облысы аумағында элеватор мен құрама жем зауытын салуға айрықша қызығушылық білдірді. Бұл жобалар агроөнеркәсіптік кешеннің дамуына ғана емес, сонымен қатар жаңа жұмыс орындарының ашылуына да жол ашады.
Өңір билігі «Qyzyljar» арнайы экономикалық аймағын кеңейту бағытында белсенді жұмыс жүргізіп жатыр. Ғ. Мүсірепов және Тайынша аудандарында жаңа субаймақтар құру жоспарланып отыр. Бұл өз кезегінде шетелдік инвесторлар үшін өндірістерді іске қосуға қолайлы жағдайлар қалыптастырып, өңір экономикасының өсуіне серпін бермек.
«Солтүстік Қазақстан облысы тікелей инвестицияларға, технологиялық әріптестікке және халықаралық бизнес өкілдерімен бірлесіп жұмыс істеуге ашық. Мұндай жобалардың жүзеге асуы өңір экономикасын нығайтып, жаңа жұмыс орындарын құрып, агроөнеркәсіп пен инфрақұрылымның дамуына қосымша серпін береді», – деді өңір басшысы.
