С. Шаймерденов атындағы қалалық классикалық гимназия Білім күнінде 30 жылдық мерейтойын атап өтті

1 қыркүйекте С. Шаймерденов атындағы қалалық классикалық гимназияда өткен салтанатты жиын қос мерекеге ұласты. Петропавлдағы білім ордасы жаңа оқу жылын бастап қана қоймай, өзінің 30 жылдық мерейтойын да атап өтті, деп хабарлайды QZ NEWS тілшісі.

Мектептің тарихы оның алғашқы директоры Жангелді Тәжиннің есімімен тығыз байланысты. Үш онжылдықтағы жемісті еңбек жылдарында педагогикалық ұжым жоғары академиялық талаптарды қалыптастырды. Гимназия жетістіктерінің қатарында «Алтын белгі» төсбелгісін алған 29 түлек және мектепті үздік аттестатпен тәмамдаған 37 оқушы бар.

Мерейлі датамен ұжымды, оқушылар мен ата-аналарды Солтүстік Қазақстан облысы әкімінің орынбасары Жүсіп Жұмағұлов құттықтады.

«Білім беру жүйесінің басты мақсаты стандартты білім берумен ғана шектелмейді. Адал, жауапты әрі отаншыл азаматтарды қалыптастыру аса маңызды», – деп атап өтті облыс әкімінің орынбасары.

Биыл гимназияның 78 бірінші сынып оқушысы үшін алғашқы қоңырау соғылды. Ал 25 он бірінші сынып оқушысы үшін мектептегі білім алудың соңғы әрі аса жауапты кезеңі басталды.

Гимназия директоры Бақыт Алдабергенованың айтуынша, алғашқы қоңыраудың әр буын оқушысы үшін өзіндік мәні бар. Бірінші сынып оқушылары үшін бұл – білім әлеміне бастар жолдың ашылуы болса, болашақ түлектер үшін мамандық пен өмірлік жолды таңдауға бағыт беретін маңызды кезең.

Жалпы, 1 қыркүйекте Солтүстік Қазақстан облысында 6 мыңнан астам бірінші сынып оқушысы үшін алғашқы қоңырау соғылды. Биылдан бастап өңір мектептерінде жаңа пәндер де енгізілді. Атап айтқанда, оқушылар «Конституция негіздері» пәнін оқиды. Ал 8–11 сынып оқушылары үшін «Заң және тәртіп» міндетті курсы енгізілді. Сонымен қатар 5–11 сынып оқушылары жол қозғалысы ережелерін, төтенше жағдай кезіндегі іс-қимыл алгоритмдерін, цифрлық гигиена негіздерін және буллингтің алдын алу шараларын меңгереді.