Солтүстік Қазақстан облысының әкімі Аққайың ауданындағы орақ науқанымен танысты
Солтүстік Қазақстан облысының әкімі Ғауез Нұрмұхамбетов жұмыс сапарымен Аққайың ауданына барды. Сапар барысында ол орақ науқанының барысын бақылап, инфрақұрылымдық жобалардың жүзеге асуымен танысты және ауылдардағы өмір сапасын жақсарту шараларын бағалады, деп хабарлайды QZ NEWS.
Аққайың ауданында жалпы 153,6 мың гектар алқаптың 23%-ы жиналды. Барлық сегіз астық қабылдау элеваторы өнімді қабылдауға дайын. Облыс әкімі ауылдардың тұрақты дамуы әлеуметтік жауапкершілігі жоғары бизнестің қатысуынсыз мүмкін еместігін атап өтті. Ол жұмыс орындарын ашып, әлеуметтік жобаларды жүзеге асырып жүрген аграрлық сала жетекшілеріне алғысын білдірді.
«Мемлекет басшысы атап өткендей: «Әрбір табысты азамат өз туған жерін ойлауы тиіс». Зенченко Г.Г., Шаймерденов Б.А., Зикирин Е.К., Герд В.В. және басқалар – туған ауылдардың дамуына нақты үлес қосып жүр. Мұндай мысалдар бүкіл өңірге үлгі. Ауылда еңбек адамдары тұрады – механизаторлар, құрылысшылар, мұғалімдер, дәрігерлер, аграршылар. Олардың күнделікті еңбегі тек ауданның емес, бүкіл облыстың тұрақты дамуының негізі болып табылады. Осы адамдардың өмірі мен еңбегіне лайықты жағдай жасау – біздің басты міндетіміз болып қала береді», – деді Ғауез Нұрмұхамбетов.
Смирново ауылында қазіргі уақытта заманауи хоккей кортының құрылысы қарқынды жүріп жатыр. Жаңа спорт нысаны жастардың бос уақытын тиімді өткізуіне және бұқаралық спорттың дамуына мүмкіндік береді. Бұдан бөлек, жергілікті мектепте күрделі жөндеу жұмыстары жүргізілуде.
Ардагерлерді қолдауға да ерекше көңіл бөлінуде. Ауданда қарт адамдарға белсенді өмір салтын ұстануға, қарым-қатынас жасауға, шығармашылықпен және спортпен айналысуға мүмкіндік беретін «Белсенді ұзақ өмір сүру орталығы» ашылды.
«Мұндай жобалар әсіресе ауылдық жерлер үшін аса маңызды, себебі аға буынның қамқорлық пен көңіл бөлуді сезінуі өте қажет», – деп атап өтті ол.
Жұмыс сапарының соңында Ғауез Нұрмұхамбетов жергілікті тұрғындармен кездесіп, олардың ұсыныстары мен сұрақтарын тыңдады. Барлық өтініштер бақылауға алынды.
