СҚО әкімі Ғауез Нұрмұхамбетов мектеп оқушылары арасындағы олимпиада жеңімпаздарын марапаттады
Петропавл қаласындағы Креативтік индустрия орталығында СҚО әкімі Ғауез Нұрмұхамбетовтың республикалық мектеп олимпиадалары мен ғылыми байқаулардың жеңімпаздары және жүлдегерлерімен кездесуі өтті. Жас дарындар өз жобаларын таныстырып, лайықты марапаттарын алып, облыс басшысынан шабыт беретін жылы лебіздерін естіді, деп хабарлайды QZ News.
Биыл өңірдегі зияткерлік қозғалыс елеулі нәтижелер көрсетті — бірден 30 оқушы республикалық олимпиадалар мен ғылыми жарыстарда жүлдегер атанды. Ғауез Нұрмұхамбетовтың айтуынша, мұндай жетістіктер — білім беру саласындағы жүйелі жұмыстың және дарынды жастарды қолдаудың нәтижесі.
«Сонымен қатар оқушылар ғылыми жобалар байқауларына белсенді қатысып келеді. Бұл — оқушылардың, мұғалімдердің және ата-аналардың жүйелі, тиянақты еңбегінің жемісі. Зерттеу жобаларының көрмесін көру — ерекше әсер қалдырды: экология мен тарихтан бастап медицина мен ғарышқа дейінгі терең тақырыптар мен нақты өмірге бағытталған жобалар. Бұл — жай ғана мектеп жұмыстары емес, болашақтағы нақты ғылыми және қолданбалы жетістіктерге жол», — деді СҚО әкімі.
Кездесуде өңірлік «Қызылжар дарыны» орталығының директоры Бахыт Ғабдулина да сөз сөйледі. Ол мұндай кездесулер дарынды балаларды қолдап, оларға шабыт сыйлайтынын атап өтті. Оқушылар өз жетістіктері туралы әңгімелеп, олимпиадалар мен байқауларға қатысу тәжірибесімен бөлісті, зерттеулерінің практикалық маңызы жайлы айтты.
Кездесу қатысушыларының бірі – «ЛОРД» мектеп-лицейінің 11-сынып оқушысы Егор Трункин тарих пәні бойынша олимпиадада бірінші орынды иеленді.
«Өткенді зерттеу арқылы біз қазіргі заманды жақсырақ түсінеміз және болашақтағы орнымызды сезінеміз. Менің жобам – тарихи фактілер мен қазіргі уақытты байланыстыруға жасалған талпыныс. Өз тамырыңды білу – биіктерден көрінудің кепілі деп сенемін», – деді Егор.
Тағы бір қатысушы – Шал ақын ауданының 10-сынып оқушысы Гаухар Мусина республикалық қазақ тілі мен әдебиеті олимпиадасында үшінші орынды иеленді.
«Қазақ тілі мен әдебиеті – менің негізгі пәндерім. Олимпиадалар білімімді тереңдетуге және өз күшіме сенуге мүмкіндік берді. Болашақта ұстаз болып, туған тілімді келер ұрпаққа сүюге үйреткім келеді», – деп бөлісті ол.
Кездесу соңында облыс әкімі оқушыларға ақшалай сертификаттар мен естелік ашық хаттар табыстап, олардың білімге құштарлығы, табандылығы және өңірдің интеллектуалдық болашағына қосқан үлесі үшін алғыс айтты.