СҚО ауыл шаруашылығы өнімдері көлемі бойынша еліміздің үздік үштігіне кірді

Солтүстік Қазақстан облысының әкімі Ғауез Нұрмұхамбетов Орталық коммуникациялар қызметіндегі брифингте 2025 жылдың 10 айының қорытындысы бойынша өңірде айтарлықтай экономикалық өсім тіркелгенін айтты. СҚО-ның қысқа мерзімді экономикалық индексі негізгі салалардың барлығындағы оң динамиканың арқасында 13%-ға өсті, деп хабарлайды QZ NEWS.

Елеулі табысқа жеткен салалардың бірі – жалпы өңірлік өнімнің төрттен бірін құрайтын агроөнеркәсіптік кешен. Ауыл шаруашылығының жалпы өнім көлемі 878,3 млрд теңгеге жетіп, СҚО-ның Қазақстан бойынша үштікке кіруіне және елдің азық-түлік қауіпсіздігін нығайтуға мүмкіндік берді.

«Өңірде Қазақстандағы астық пен майлы дақылдардың ¼ бөлігі, сондай-ақ сүттің 1/10 бөлігі өндіріледі. Егіншілік саласында жоғары нәтижелерге қол жеткізілді: 4,3 млн гектар алқаптан өнім жиналды, майлы дақылдар алаңы 1 млн гектарға дейін ұлғайды. Бұл – еліміздегі ең жоғары көрсеткіш.
Майлы дақылдар бойынша тарихи максимумға қол жеткізілді – 1,2 млн тонна. Биыл облыс бойынша орташа өнімділік гектарына 21,4 центнерді, ал жалпы өнім көлемі рекордтық 6,5 млн тоннаны құрады. Кейбір шаруашылықтар гектарынан 60 центнерден астам өнім алды», – деді өңір басшысы брифинг барысында.