СҚО-да спортты дамыту: Әділхан Сағындықов аудандарды аралауда
Солтүстік Қазақстан облысы дене шынықтыру және спорт басқармасы басшысының міндетін атқарушы Әділхан Сағындықов өңір аудандарын аралап, спорт инфрақұрылымының жай-күйімен және балалар мен жасөспірімдер спорт мектептерінің жұмысымен танысып жүр, деп хабарлайды QZ News.
Әділхан Сағындықов облыстың бес ауданында — Қызылжар, Тайынша, Ақжар, Аққайың және Уәлиханов аудандарында болды. Инспекция аясында ол спорт нысандарын қарап, БЖСМ жағдайын бағалап, жаттықтырушылармен және мектеп басшыларымен кездесулер өткізді.
Дене шынықтыру және спорт басқармасының баспасөз қызметі хабарлағандай, сапар барысында анықталған мәселелерді шешу бойынша тапсырмалар беріліп, аудандарда дене шынықтыру мен спортты одан әрі дамыту жөніндегі негізгі міндеттер айқындалды. Ерекше көңіл материалдық-техникалық базаны жақсартуға, бұқаралық спортпен айналысу үшін жағдай жасауға және жас спортшыларды даярлауға бөлінді.
Сапардың маңызды сәттерінің бірі — Уәлиханов ауданының балалар-жасөспірімдер спорт мектебінің директоры Бектай Хасеновке Құттықтау хат табыстау болды. Ол спорт саласында 46 жыл еңбек еткен. Әділхан Сағындықов оны өңір спортының дамуына қосқан көпжылдық адал еңбегі үшін алғысын білдіріп, құрметті еңбек демалысына шығуына байланысты ізгі тілегін айтты.
Аудандардағы спорт инфрақұрылымын тексеру және жас спортшыларды даярлау сапасын арттыру жұмысы жалғасын табатын болады.