СҚО шағын бизнесі Петропавлдағы жәрмеңкеде өз өнімдерін ұсынды

Ірі бизнесте инвестиция мен өндірістік қуат есепке алынса, шағын кәсіп көбіне әуестік пен өз қолымен бір дүние жасауға деген ықыластан, сондай-ақ өз күшіне сенуден басталады. Осындай оқиғаларды Республика күні қарсаңында Петропавлдағы «Достық Молл» сауда-ойын-сауық орталығында өткен жергілікті кәсіпкерлер жәрмеңкесінен көруге болады. Сауда орындарында ірі компаниялардың өкілдері емес, сүйікті ісін сұранысқа ие кәсіпке айналдырған адамдар өз өнімдерін ұсынды, деп хабарлайды QZ NEWS тілшісі.

Жәрмеңкеге қатысушылар көп болды. Әрқайсысы өз өнімін ала келген. Мұнда қолдан жасалған бұйымдар, үйде дайындалған шұжықтар мен ет деликатестері, сүт өнімдері, мамық көрпелер мен жастықтар, ұлттық тағамдар сатылды. Кәсіпкерлердің жұмыс бағыттары, өндіріс көлемі мен жоспарлары әртүрлі болғанымен, оларды ортақ бір нәрсе біріктіреді: барлығы да үлкен капиталсыз, шағын істен бастап, біртіндеп тәжірибе жинап, тұрақты тұтынушылар ортасын қалыптастырған.

Жәрмеңке азық-түлік және азық-түлікке жатпайтын тауарлар өндіретін 24 кәсіпкердің басын қосты. Олардың көпшілігі Солтүстік Қазақстан облысының Кәсіпкерлер палатасы 2023 жылдан бері жүзеге асырып келе жатқан «Бір ауыл – бір өнім» жобасына қатысады. Жоба жергілікті брендтерді дамытуға көмектесіп, өндірушілерге өз өнімдерін тұтынушыларға таныстыруға мүмкіндік береді.

Петропавл тұрғыны Оксана Обанина өз кәсібін өнер арқылы бастаған. Көркемдік білімі мен портрет салудағы көпжылдық тәжірибесіне сүйене отырып, ол керамикалық бұйымдар жасайтын әрі ересектер мен балаларға арналған шеберлік сабақтарын өткізетін арт-шеберхана ашқан. Мұнда дайын кесе немесе стақан сатып алуға ғана емес, сазбен жұмыс істеп, бұйым жасауды және оны бояуды үйренуге де болады.

«Адамдар бізге жай ғана тауар сатып алу үшін емес, жаңа әсер алу үшін келсе деймін. Кейде күнделікті күйбең тірліктен бір сәтке арылып, өзгеше нәрсені байқап көру және өз еңбегінің нәтижесін көру маңызды. Біз шығармашылық атмосфераны дәл осы мақсатта қалыптастырамыз», – деді Оксана Обанина.

М. Жұмабаев ауданының тұрғыны Светлана Карабанованың кәсіпке деген көзқарасы мүлде бөлек. Ол ешкі өнімдерін өндіретін шаруашылықты дамытып келеді. Шаруашылығында 150 сауынды ешкі бар. Өнім түрлерінің қатарында сүттен жасалған 58 түрлі және еттен дайындалған 19 түрлі өнім бар. Тауарлар Петропавлға, Көкшетауға және Астанаға жеткізіледі.

Жеке өндірісті дамыту үшін қаржы қажет. Сондықтан кәсіпкер мемлекеттік қолдаудың қолжетімді тетіктерін пайдаланған. Дегенмен оның жұмысының негізінде тек коммерциялық есеп қана емес, өнім сапасына деген жеке жауапкершілік те жатыр.

«Мен өз отбасымның дастарханына қандай өнім қойылатынына сенімді болғым келеді. Өнімнің жануарларға күтім жасаудан бастап, дайын тауарға дейінгі бүкіл жолын білу мен үшін маңызды. Бұл үнемі назар аударып, жауапкершілік танытуды талап етеді. Бірақ мен дұрыс деп санайтын ұстаным – осы», – деп бөлісті Светлана Карабанова.

Петропавлдық аспаз Александр Волобуев қоғамдық тамақтану саласында 15 жылдан астам уақыт жұмыс істегеннен кейін кәсіптің жаңа бағытын байқап көруге шешім қабылдаған. Ол шұжық өндіру технологияларын меңгеріп, арнайы оқудан өтіп, үй жағдайында ет деликатестерін дайындай бастаған. Әзірге оған кәдімгі пеш жеткілікті. Соған қарамастан, өнімдері бірнеше қаладан өз сатып алушыларын тауып үлгерген.

«Бұл істе тек сәтті бастамаға ғана сенуге болмайды. Үнемі үйреніп, нәтижені бақылап, адамдардың пікіріне құлақ асу қажет. Егер сатып алушы сол өнімді қайтадан алуға келсе, демек, дұрыс бағытта келе жатырсың», – дейді Александр Волобуев.

Мамлютка қаласының тұрғыны Юлия Бикина да он жылдан бері шағын кәсібін дамытып келеді. Ол тұрғындардан қаздың мамығын сатып алып, шикізатты өңдеп, жастық, көрпе және мамық төсек дайындайды. Өндіріс көлемі әзірге шағын, кәсіпте екі адам жұмыс істейді. Кәсіп негізінен өз қаражаты есебінен дамып келеді. Соған қарамастан, тапсырыстар Қазақстанның әртүрлі өңірлерінен және шетелден түседі.

«Біздің үлкен цехымыз да, көп адамнан тұратын ұжымымыз да жоқ. Есесіне, әр тапсырысқа жеке көңіл бөле аламыз. Сатып алушылар өз қажеттіліктеріне қарай бұйымның түрі мен өлшемін таңдайды. Шағын өндіріс үшін мұндай мүмкіндік өте маңызды», – деп атап өтті Юлия Бикина.

Жәрмеңкеде басқа да кәсіпкерлердің өнімдері ұсынылды. Олардың қатарында үйде дайындалған қымыз, бауырсақ, сүрленген ет және ұлттық тағамдар сататын сауда орындары болды.

Өңір экономикасы тек ірі кәсіпорындар мен миллиондаған қаржы жұмсалатын жобалардан тұрмайды. Оны шеберханалар ашып, шағын шаруашылықтарды дамытып, жергілікті шикізатты өңдеп, тұтынушыларға өз өнімдерін ұсынатын адамдар да қалыптастырады. Біреулер үшін бұл әзірге отбасылық кәсіп болса, енді біреулер үшін
негізгі табыс көзіне және болашақта кәсібін кеңейтуге мүмкіндік беретін бағытқа айналған.