Жасанды интеллект пен телемедицина СҚО-да әлеуметтік қызметтерді қолжетімді ете түсуде
Петропавлда «AMANAT» партиясы жанындағы СҚОФ жанындағы отбасы және халықты әлеуметтік қорғау мәселелері жөніндегі өңірлік кеңес отырысында цифрлық технологиялардың Солтүстік Қазақстан облысындағы негізгі өмір салаларын қалай өзгертіп жатқаны талқыланды. Негізгі назар жасанды интеллектке, телемедицинаның дамуына және электронды карталарға аударылды. Бұл жаңашылдықтар әсіресе ауыл тұрғындары үшін әлеуметтік қызметтерді қолжетімді етуде, деп хабарлайды QZ NEWS.
Өз сөзінде СҚО білім басқармасы басшысының орынбасары Татьяна Протопопова білім берудегі цифрландырудың жай ғана тренд емес, қажеттілік екенін атап өтті. Ол мектеп бағдарламаларына жасанды интеллект элементтерінің енгізіліп жатқанын жеткізді.
«2025-2026 оқу жылынан бастап «Цифрлық сауаттылық» және «Информатика» пәндеріне жасанды интеллектке қатысты модульдер енгізіледі. Қазірдің өзінде 270 жоғары сынып оқушысы бағдарламалау мен жасанды интеллект бойынша арнайы курстардан өтті. 300-ден астам педагог заманауи STEM жабдықтарымен жұмыс істеуді меңгеріп, оқушыларды жаңа цифрлық дәуірге дайындауда», – деді Татьяна Протопопова.
Ал СҚО денсаулық сақтау басқармасы басшысының орынбасары Мамадияр Байғұлов цифрлық сервистердің медицинаны қалай өзгертіп жатқанын баяндады. Оның айтуынша, басты жетістік – телемедицинаның және денсаулықты қашықтан бақылаудың дамуы.
«Ауыл тұрғындары енді өз ауылынан шықпай-ақ кардиолог, эндокринолог сияқты тар бейінді мамандардан кеңес ала алады. Пилоттық жоба аясында 8 мыңнан астам осындай онлайн-консультациялар өткізілді. Smart ECG жүйесінің енгізілуі дәрігерлерге электрокардиограммаларды қашықтан расшифрлап, диагноз қою мен көмек көрсетуді жеделдетуге мүмкіндік беруде», – деді Мамадияр Байғұлов.
Отырысқа қатысушылардың пікірінше, цифрландыру – өзі мақсат емес, адамның қажеттілігіне бейімделген мемлекеттік қызметтерді сапалы, қолжетімді ететін құрал. Бұл Мемлекет басшысының Жолдауында қойылған міндеттерге толық сәйкес келеді.