8 наурызға орай СҚО күштік құрылымдарының әйел қызметкерлерінің арасында волейболдан турнир өтті
Солтүстік Қазақстан облысында күштік құрылымдарда қызмет ететін әйелдер арасында екі күнге созылған волейбол турнирі аяқталды, деп хабарлайды QZ NEWS тілшісі.
Спорттық жарыс түрлі ведомство өкілдерін біріктіріп, қатысушыларға тек физикалық дайындықтарын ғана емес, сонымен қатар командалық үйлесімділік, табандылық пен мінез мықтылығын көрсетуге мүмкіндік берді. Жарыс тартысты әрі көрерменге әсерлі өтті. Командалар жоғары дайындық деңгейін, жеңіске деген жігерін және ұйымшылдығын көрсетті. Турнир тек спорттық дода ғана емес, сонымен қатар өңірдің түрлі күштік құрылымдарында қызмет ететін әйелдер арасындағы кәсіби байланыстарды нығайтып, өзара тәжірибе алмасуға мүмкіндік берген маңызды алаңға айналды.
Турнирдің мықты командаларының бірі Қазақстан Республикасы Ұлттық ұланы академиясы құрамасы болды. Спортшы қыздар өз оқу орнын лайықты таныстырып, тартысты бәсекеде құрметті екінші орынды иеленді. Барлық матч барысында команда сенімді ойын, жақсы техника және алаңдағы үйлесімді әрекеттерін көрсетті.
Турнирде академия өкілі Ардақ Макенова ерекше көзге түсті. Жарыс қорытындысы бойынша ол «Үздік либеро» арнайы номинациясымен марапатталды. Бұл марапат оның шеберлігі, жанкештілігі мен тыңғылықты дайындығының лайықты нәтижесі болды. Спортшы алаңда қорғаныста сенімді ойын көрсетіп, допты дәл қабылдап, күрделі ойын жағдайларында жылдам шешім қабылдай білетінін дәлелдеді.
Қазақстан Республикасы Ұлттық ұланы академиясы ұжымы спортшы қыздарды табысты өнер көрсетулерімен құттықтап, мұндай жетістіктер курсанттар мен жас әскери қызметшілер үшін үлгі екенін атап өтті.
Ұйымдастырушылардың айтуынша, мұндай турнирлер күштік құрылым қызметкерлері арасында ұжымдық рухты нығайтып, спорт мәдениетін дамытуда маңызды рөл атқарады.
Қатысушылар үшін бұл тек спортта өз мүмкіндігін көрсету ғана емес, сондай-ақ әріптестік қарым-қатынасты нығайтып, бір-бірін қолдап, тәжірибе алмасуға мүмкіндік береді.
Жарыстың Халықаралық әйелдер күні қарсаңында өтуі шараға ерекше мән берді. Турнир қазіргі заманғы әйел әскери қызметшілердің жоғары жауапкершілік пен тәртіпті талап ететін қызметті спорттық жетістіктермен және белсенді өмір салтымен сәтті ұштастыра алатынын тағы бір мәрте дәлелдеді.