Надежда Морозова Олимпиада–2026 конькимен жүгіруден ТОП-6 қатарына енді
Солтүстік Қазақстан облысының өкілі Надежда Морозова XXV қысқы Олимпиада ойындарында сәтті өнер көрсетіп, 3000 метр қашықтықта 4:01.20 нәтижемен мәреге алтыншы болып жетті. Бұл туралы СҚО дене шынықтыру және спорт басқармасының баспасөз қызметі хабарлады, деп жазады QZ NEWS.
Жарыс барысында 27 жастағы спортшы біраз уақыт аралық хаттамада көш бастап тұрғанымен, үздік қатысушылар арасындағы бәсекенің қорытындысы бойынша әлемнің ең мықты алты конькиші қыздарының қатарынан көрінді.
Надежда Морозова — Астана қаласының тумасы. Соңғы екі жыл бойы ол Солтүстік Қазақстан облысының намысын ресми түрде қорғап келеді. Халықаралық жарыстарға дайындығын оның жаттықтырушысы Ольга Ихтендрис жүргізуде.
Морозова үшін Олимпиада бағдарламасы әлі жалғасуда: 9 ақпанда ол 1000 метр қашықтықта өнер көрсетіп, жүлделі орындар үшін күресуді көздеп отыр.