Петропавл спорт орталығына айналмақ: Қалада халықаралық деңгейдегі мұз және әмбебап ареналар салынады
Солтүстік Қазақстан облысында спорттық инфрақұрылымды дамыту қарқынды түрде жалғасуда. Әлемдік деңгейдегі үстел теннисі орталығының салынуы мен УЕФА талаптарына сай қайта жаңғыртылған «Қарасай» стадионынан кейін, Петропавл қаласында тағы екі ірі спорт нысанының құрылысы жоспарланып отыр, деп хабарлайды QZ NEWS.
СҚО әкімі Ғауез Нұрмұхамбетов Қизатов көшесіндегі құрылыс алаңын аралап көрді. Бұл жерде көпфункционалды мұз аренасы бой көтермек. Кешенде 400 метрлік конькимен жүгіру жолы, екі хоккей корты және кёрлинг алаңдары болады. Барлық құрылымдар халықаралық стандарттарға сай салынады.
Мұз аренасының жанында әмбебап спорт кешені де бой көтермек. Онда 50 метрлік олимпиадалық жүзу бассейні, жекпе-жекке залдар, көркем гимнастикаға, сондай-ақ волейбол, баскетбол және фитнеске арналған заманауи залдар болады.
Жаңа нысандардың іске қосылуы Петропавлда жоғары деңгейдегі халықаралық жарыстарды өткізуге мүмкіндік беріп, қаланы өңірлік әрі республикалық спорт өмірінің маңызды орталығына айналдырады деп күтілуде.