Солтүстікқазақстандық гимнаст қыздар Астанада өткен чемпионатта сенсациялық жеңіске жетті

Астанада өткен ашық чемпионатта Солтүстік Қазақстан облысының көркем гимнастика командалары сәтті өнер көрсетіп, жоғары жүлделі орындарды жеңіп алды. Олар тынымсыз дайындықтарының арқасында үздіктер қатарынан көрінді, деп хабарлайды QZ NEWS.

Жарысқа СҚО атынан бес команда қатысты: екеуі спорт шебері (СС) бағдарламасы бойынша, үшеуі спорт шеберлігіне үміткер (ССК) бағдарламасы бойынша. Қорытындысында солтүстікқазақстандық гимнасттар екі бағдарламада да алдыңғы қатарға шықты:

СС бағдарламасы бойынша

«Олимп» БЖСМ командасы – 1 орын

«Сияние» командасы – 3 орын

ССК бағдарламасы бойынша

1 орын – «Малинки» командасы

2 орын – «Взлет» командасы

3 орын – «Грация» командасы

Командалардың жаттықтырушысы Анастасия Норкина атап өткендей, бұл жарыс бақылау сипатында өтті және Қазақстан Республикасының чемпионатына дейін жаңа бағдарламаларды сынақтан өткізу үшін пайдаланылды.

«Бұл жарысқа біз жаңа бағдарламаны сынап көру үшін бардық. Қыздар қойылған тапсырмалар мен жаңа жаттығуларды қалай орындайтынын көру маңызды болды. Әрине, бағдарлама жаңа болғандықтан, қателіктер де болды. Бірақ әрбір жаңа стартта олар азая береді. Қарсыластарымыз да жаңа маусымды жаңа бағдарламамен бастады, сондықтан бәрі тең жағдайда. Яғни, аз қателескен команда жеңіске жетеді», – деді Анастасия Норкина.

Жаттықтырушы сондай-ақ спортшылардың эмоциялары туралы да бөлісті:

«Қыздардың осындай жақсы нәтиже көрсетуі біз үшін де, өздері үшін де тосынсый болды. Ешкім жүлделі орындарды аламыз деп күтпеген. Алдымен сәл абдырап қалды, бірақ кейін қуаныштан жүздерінен күлкі кетпеді», – деп қосты ол.

Келесі жарыс – Қазақстан Республикасының чемпионаты – қазанның 14–18 аралығында Шымкент қаласында өтеді. Онда спорт шеберлігіне кандидаттар мен спорт шеберлері жекелеген көпсайыс түрлерінен өнер көрсететін болады.