«Жас Жауынгер» клубының жас чемпиондары республиканы бағындыруға дайындалуда
«Жас Жауынгер» дене шынықтыру-сауықтыру кешенінің «Тұсау кесер» алаңында инклюзивті-бейімделген спорт түрі – АРМ-БАСК бойынша турнир өтті. Жарыс Петропавл қаласындағы клуб филиалының екі жылдығына арналды. Қысқа уақыт ішінде бұл орталық ерекше қажеттіліктері бар балалар үшін нағыз күш пен даму ордасына айналды, деп хабарлайды QZ News тілшісі.
Клуб 2024 жылдың ақпан айында ашылған сәттен бастап Сәдік Байымбетовтің жетекшілігімен 5 пен 18 жас аралығындағы балаларға тегін жаттығу базасы ретінде жұмыс істеп келеді. Оқу-жаттығу үдерісі «Қазақстан Халқына» қорының қолдауымен әзірленген авторлық әдістеме бойынша жүргізіледі. Жаттықтырушы Ақжан Нәкеновтың айтуынша, балалар аптасына үш рет жаттығып, бокс, жекпе-жек, армрестлинг және ММА бағыттарын меңгеруде.
Жарыс «QAGAN» академиясының залында өтті. Турнирге 25 спортшы қатысып, олардың әрқайсысы медаль және дипломмен марапатталды.
Әрбір қатысушының марапатпен оралуы – олардың еңбегін мойындау мен әлеуметтену жолындағы маңызды кезең. Жас спортшыларды қолдауға қалалық мәслихат депутаты Салимхан Сабитов келді. Ол ата-аналарға табандылықтары үшін алғыс айтып, Қазақстанда кедергісіз орта қалыптастыруды мақсат еткен «Кедергісіз келешек» жобасын атап өтті.
Жаттықтырушы Ақжан Нәкеновтың айтуынша, жаттығулар аптасына үш рет өтеді. Дайындық бағдарламасына бокс, жекпе-жек (күрес), армрестлинг, ММА және инклюзивті-бейімделген АРМ-БАСК спорт түрі кіреді.
АРМ-БАСК бағыты бойынша клуб спортшылары жылына төрт ретке дейін Қазақстан Республикасының чемпионаттарына қатысады. Айтарлықтай жетістіктер де бар: 2024 жылы республикалық деңгейде үшінші орын, ал 2025 жылы Шымкент қаласында өткен чемпионатта бірінші орын иеленді.
Қазіргі таңда команда 26 ақпанда Астана қаласында өтетін АРМ-БАСК бойынша Қазақстан Республикасының чемпионатына белсенді дайындық үстінде. Дәстүр бойынша әрбір жарыс сапарының алдында клуб ішінде іріктеу турнирі ұйымдастырылады.