Петропавлда ерекше қолдау мен қамқорлықты қажет ететін отбасыларға көмек көрсетілді
Солтүстік Қазақстан облысында полиция қызметкерлері, психологтар, еріктілер қозғалысының өкілдері мен кәсіпкерлер ерекше қолдау мен қамқорлықты қажет ететін отбасыларға көмек көрсету үшін күш біріктірді, деп хабарлайды QZ NEWS тілшісі.
Кездесуді СҚО ПД Қоғамдық қауіпсіздік басқармасының тұрмыстық зорлық-зомбылыққа қарсы күрес бөлімінің қызметкерлері облыс әкімдігі жанындағы Әйелдер істері және отбасылық-демографиялық саясат жөніндегі комиссиямен және Жастар ресурстық орталығымен бірлесіп ұйымдастырды.
Іс-шара Борки шағынауданындағы Олимпиадалық резервті даярлау орталығында өтті. Ата-аналар мен балалар үшін интерактивті ойындар, командалық сайыстар, «Жазғы отбасылық биатлон» және «Отбасылық куб» психологиялық ойыны қамтылған мазмұнды бағдарлама әзірленді. Бірлескен тапсырмалар арқылы қатысушылар бір-бірін жақынырақ танып, отбасының ең жылы естеліктерін еске алып, армандары мен бір-біріне деген қолдау сөздерімен бөлісті.
Ұйымдастырушылар психологиялық қолдауға ерекше көңіл бөлді. Психикалық денсаулық орталығының психологі Ирина Якимова сенімді қарым-қатынас орнату, өзара сыйластық және отбасылық жанжалдарды бейбіт жолмен шешу тақырыбында тренинг өткізді.
«Мұндай кездесулер отбасыларға уақытты бірге қызықты өткізуге ғана емес, бір-бірін жақсырақ тыңдап, түсінуге де мүмкіндік береді. Сенім, ашық диалог және өзара құрмет – берік отбасының басты негізі», – деді Психикалық денсаулық орталығының психологі Ирина Якимова.
Бағдарламаның ерекше бөлігінің бірі – биатлон спортымен танысу болды. Олимпиадалық резервті даярлау орталығының қолдауымен қатысушылар бұл спорт түрінің негізгі қырларымен танысып, винтовкадан оқ атып көруге мүмкіндік алды. Бұл балалар мен ересектерге жаңа әсер сыйлап, өздерін біртұтас команда ретінде сезінуге жол ашты.
Кездесу жергілікті кәсіпкерлердің қолдауымен ұйымдастырылған отбасылық табиғат аясында дем алумен қорытындыланды.