Елорда тұрғыны, СҚО-да синтетикалық есірткіні ірі көлемде сатты деген күдікпен ұсталды
Солтүстік Қазақстан облысында полицейлер есірткі сату арнасының ірі жолын тоқтатып, 22 жастағы елорда тұрғынын ұстады, деп хабарлайды QZ NEWS.
Тергеу нұсқасына сәйкес, жас жігіт синтетикалық есірткіні интернет арқылы таратумен айналысқан. СҚО ПД есірткі қылмысына қарсы іс-қимыл басқармасында оның 20 қыркүйекте Петропавлға келгенін және сол күні аса ірі көлемдегі психотроптық заттармен ұсталғанын мәлімдеді.
«Мефедронның баламасы бар 34 түйіншек тәркіленді. Тағы 60 түйіншекті полицейлер жалдамалы пәтерден тапты. Барлығы 104 грамм «синтетика» алынды. Тергеу жүргізілуде. Айта кетерлігі, мұндай көлемдегі синтетика жүздеген «қалтаға» бөлініп үлгерер еді. Ұсталған күдікті қала аумағының едәуір бөлігінде есірткінің таралуына жол бермеді», – делінген полиция хабарламасында.
Жедел уәкілдердің айтуынша, есірткі сатуды ұйымдастырушылар жастарды оңай әрі тез байлыққа уәде беріп, өздеріне тартады. Алайда іс жүзінде бұл көп жағдайда заңсыз әрекеттің алғашқы апталарында, тіпті күндерінде-ақ ұсталуға алып келеді.
«Жыл басынан бері СҚО-да полицейлер есірткі сату күдігімен 40-тан астам адамды ұстады, оның 36-сы – 25 жасқа толмағандар. Аса ірі көлемде есірткі сату 7 жылдан 12 жылға дейінгі мерзімге бас бостандығынан айыру жазасын қарастырады», – деп атап өтті СҚО полициясында.
Полицейлер студенттермен және жоғарғы сынып оқушыларымен жүйелі түрде профилактикалық жұмыстар жүргізіп, оларды «оңай олжаның» арбауынан сақтап, болашағын құртып алмауға шақыруда. Наркобизнеске қарсы кешенді күнделікті жұмыс жалғасуда.
