М. Жұмабаев атындағы Жоғары колледж директоры Ерлік Жанділдин өмірден өтті
62 жасында М. Жұмабаев атындағы Жоғары колледждің директоры Жанділдин Ерлік Борисұлы дүниеден өтті. Бұл туралы оқу орнының әлеуметтік желідегі парақшасында хабарланды, деп жазады QZ NEWS.
«Терең қайғы мен жүрек ауыртпалығымен орны толмас қазаны хабарлаймыз – бүгін бізден ардақты, қадірлі, сүйікті директорымыз – Ерлік Борисұлы өмірден озды. Ол әрқайсымыз үшін жай ғана директор емес еді. Біз тірегімізді, шабыт берушімізді, ұстазымызды, үлкен ұжымымыздың жүрегін жоғалттық. Ерлік Борисұлы – ерекше жан, даналық пен мейірімнің адамы. Ол әрқайсымыз үшін абырой мен адамгершіліктің үлгісі болып қалады. Біз оның құндылықтарын, рухын, колледжге және студенттерге деген махаббатын мәңгі жадымызда сақтаймыз», – делінген хабарламада.
Ерлік Жанділдин 1964 жылы Булаев ауданының Молодежное ауылында дүниеге келген. Ол өзінің кәсіби өмірін маңызды әлеуметтік мәселелерді шешуге және білім саласын дамытуға арнады. Қарапайым комсомол комитетінің хатшысынан бастап облыс деңгейіндегі басшылық қызметтерге дейінгі жолдан өтті.
Ерлік Борисұлы Қазақ ауыл шаруашылығы институтын (1988) және Қазақ мемлекеттік заң академиясын (2000) тәмамдаған. Ол мемлекеттік басқару мен білім саласында бірқатар маңызды қызметтер атқарды, соның ішінде:
СҚО Тимирязев ауданы әкімі аппаратының басшысы
СҚО ішкі саясат басқармасының басшысы
СҚО Айыртау ауданының әкімі
2016 жылдан бастап Ерлік Борисұлы Петропавл гуманитарлық колледжін (қазіргі – М. Жұмабаев атындағы Жоғары колледж) басқарды. Оның жетекшілігімен колледж техникалық және кәсіптік білім беру саласында мемлекеттік саясатты белсенді түрде жүзеге асырды.
Негізгі жетістіктерінің қатарында:
Ағылшын тілін меңгерген педагогтарды даярлау мамандықтарын лицензиялау;
«Серпін» және «Баршаға арналған тегін кәсіби-техникалық білім» жобаларына қатысу;
Модульдік-құзыреттілік тәсілін енгізу және қолданбалы бакалавриатқа көшуге дайындық.