Мемлекеттік корпорация 073/у медициналық анықтамаларын тексеруді автоматтандырды
«Азаматтарға арналған үкімет» мемлекеттік корпорациясы Қазақстан Республикасы Денсаулық сақтау министрлігінің ақпараттық жүйесімен интеграцияны аяқтады. Бұл жаңашылдықтың арқасында енді жүргізуші куәлігін алу кезінде 073/у үлгісіндегі жалған медициналық анықтаманы ұсыну мүмкіндігі толығымен жойылды, деп хабарлайды QZ News.
Мемлекеттік корпорацияның мәліметінше, енді «Жүргізуші куәлігін беру» мемлекеттік қызметін алу барысында азаматтардан медициналық анықтаманы қағаз түрінде тапсыру талап етілмейді. Медициналық тексерістің нәтижелері тікелей Халыққа қызмет көрсету орталығының Интеграцияланған ақпараттық жүйесіне автоматты түрде түседі.
Бұл жаңашылдық өтінімдерді қарау процесін едәуір жеделдетіп, жалған құжаттарды ұсыну жағдайларын болдырмайды және жүргізуші куәлігін алу рәсімінің ашықтығын арттырады. Аталған бастама ауқымды цифрлық трансформацияның бір бөлігі болып табылады және мемлекеттік қызметтердің сапасы мен қолжетімділігін арттыруға бағытталған.