Петропавлда күнбағыс майының бағасын көтеру фактілері анықталды
Петропавлда азық-түлік тауарларының бағасын қалыптастырудағы делдалдық тетіктерді зерттеу жөніндегі өңірлік комиссияның отырысы өтті. Онда күнбағыс майының негізсіз қымбаттауы анықталды, деп хабарлайды QZ NEWS.
Тексеру барысында қаладағы кейбір дүкендерде «Слобода» майының бір литріне сауда үстемесі 25,4%-ға дейін жеткені белгілі болды, бұл белгіленген нормадан жоғары. Мысалы, сатып алу бағасы 925 теңге болған май 1160 теңгеден сатылған. Мұндай заңбұзушылықтар облыс орталығындағы он сауда нүктесінде тіркелді.
Комиссия әлеуметтік маңызы бар тауарлардың бағасын көтеру заңға қайшы екенін және халықтың өнімге қолжетімділігіне теріс әсер ететінін атап өтті. Биылғы жылдың басынан бері осындай бұзушылықтар үшін 68 кәсіпкер жауапкершілікке тартылған.
Комиссия құрамына кірген «AMANAT» партиясының өкілдері мұндай жағдайларды болашақта болдырмау үшін тұрақты мониторинг жүргізіп, қатаң шаралар қабылдау қажеттігін айтты.