Петропавлда оқушыларға салауатты өмір салтының артықшылықтары түсіндірілді

Петропавлда оқушылар мен жастарға саналы таңдау жасаудың және салауатты өмір салтын ұстанудың маңыздылығы түсіндірілді. №17 орта мектепте «Заң және тәртіп» республикалық бағдарламасы аясында «Тәуелділік пе? Менің жолым емес!!!» атты спорттық-профилактикалық іс-шара өтті, деп хабарлайды QZ NEWS тілшісі.

Іс-шараға қатысушылар есірткі, алкоголь және басқа да психобелсенді заттарды қолданудың салдары туралы профилактикалық ақпарат алып қана қоймай, спорттық сайыстарға да қатысты. Ұйымдастырушылар дене жаттығулары арқылы белсенді демалыс, спорт және командалық жұмыс зиянды әдеттерге лайықты балама бола алатынын көрсетуді мақсат етті.

Жеке жауапкершілік мәселесіне де ерекше назар аударылды. Жастарға тәуелді мінез-құлықтың қалыптасу қаупі және дер кезінде дұрыс таңдау жасаудың маңыздылығы түсіндірілді.

«Профилактика – есірткі мен басқа да тәуелділіктердің зияны туралы әңгімелеумен ғана шектелмейді. Біздің міндетіміз – жастарға спорт, шығармашылық, пайдалы іспен айналысу, қарым-қатынас жасау және қоғамдық өмірге белсенді араласу сияқты нақты баламаларды көрсету. Осындай бағыттар жас адамның дамуына, мақсат қойып, өз болашағына жауапкершілікпен қарауына көмектеседі», – деді Петропавл қаласының Жастар ресурстық орталығының жетекшісі Дамир Абдин.

Іс-шараны №17 Ұлттық жаңғыру мектебі, Петропавл қаласының Жастар ресурстық орталығы және Нашақорлықтың алдын алу жөніндегі кеңес ұйымдастырды. Мұндай бастамалар жастардың ақпараттану деңгейін арттырып, салауатты әрі белсенді өмір салтын ұстануға деген тұрақты ынтасын қалыптастыруға бағытталған.