Петропавлда Жұмысшы кенті мен әуежайды жалғайтын автожол салу жобалануда
Облыс орталығында жолдарды асфальттау және жөндеу жұмыстары белсенді жүргізілуде. Қала әкімі Серік Мұхамедиевтің халықпен есептік кездесуінде айтылғандай, жаз басталғалы ағымдағы жөндеумен 3 шақырым жол қамтылған. Маусым айының соңына дейін жалпы ұзындығы 30 шақырым жол жөнделуі жоспарланып отыр, деп хабарлайды QZ News.
Бұған қоса, Бірлік шағын ауданында ұзындығы 7 шақырымды құрайтын жолдарға орташа жөндеу жұмыстары басталды.
«Сонымен қатар бірқатар өтпелі жобалар жүзеге асырылуда. Мысалы, ұзындығы 1,3 км болатын Малая көшесінің құрылысы жүргізілуде. Жоба аясында жолға асфальт төсеу, жайлы мектепке дейін жол жиектерін салу қарастырылған. Мектептің кіреберісіне апаратын жол мен автотұрақ аймағы да жобада қамтылған. Универсальная көшесіндегі жол өткелі бойынша Универсальная және Кошевой көшелері жағынан қадалар қағылып бітті. Қазір жол жабынын төсеу жұмыстары жүргізілуде. Жобаны аяқтау 2025 жылдың қазанына жоспарланған. Сондай-ақ, ұзындығы 0,43 км болатын Қазбек Байболов көшесін салу жобасы да өтпелі жоба ретінде қарастырылған. Қазіргі уақытта жеткізушіні анықтау процедурасы жүргізілуде. Биыл Гагарин көшесінен Өрт сөндіру депосына дейінгі аралыққа асфальт төсеу жоспарлануда», – деді қала әкімі.
Сондай-ақ, Жұмысша кентін әуежаймен бау-бақша аумағы арқылы жалғайтын жаңа автожол жобасы әзірленіп жатыр. Қала басшысы атап өткендей, 2024 жылғы су тасқыны кезінде Мамлютка бағытындағы автожол мен «Оңтүстік» бекеті маңындағы аумақта су тасып, қалаға кіретін жол іс жүзінде жабылған. Жаңа жолды салу мұндай төтенше жағдайлар қайталанған жағдайда қалаға кедергісіз кіру мен шығуды қамтамасыз ететін баламалы бағыт құруға мүмкіндік береді.
«Береке шағын ауданындағы көлік жүктемесін азайту мақсатында «Фрунзе көшесін Волочаевская көшесінен Қ. Байболов көшесіне дейін, әрі қарай Сенная және Ю. Медведев көшелеріне шығатын жол салу» жобасы әзірленуде. Ұзындығы – 2,6 км. Бұл жоба Береке шағын ауданының көлік қатынасын едәуір жақсартып, оны қаланың орталығымен тікелей байланыстырады. Жобалық-сметалық құжаттаманың сараптамасы ағымдағы жылдың қарашасына дейін дайын болады деп күтілуде. Сонымен қатар, Бірлік-1 және Бірлік-2 жаңа шағын аудандары үшін көлік инфрақұрылымын қамтамасыз ететін Қизатов көшесін қайта жаңарту жобасы да әзірленуде. Жоба аясында жол жолағы төртке дейін кеңейтіліп, екі жағынан жол жиектері салынады, нөсер кәрізі және басқа да ілеспе жұмыстар атқарылады», – деді Серік Мұхамедиев.