Солтүстік Қазақстан облысының әкімі «Береке» шағын ауданында салынып жатқан жайлы мектепті тексерді

«Береке» шағын ауданы қазіргі заманғы әлеуметтік инфрақұрылым орталығына айналып, қала тұрғындары үшін тартымды орынға айналуда. Шағын ауданда жаңа арнайы мектеп, балабақша және спорт кешені салынды. Енді осы нысандарға 600 орындық жайлы мектеп те қосылады, деп хабарлайды QZ News.

Солтүстік Қазақстан облысының әкімі Ғауез Нұрмұхамбетов «Береке» шағын ауданында салынып жатқан жаңа жайлы мектептің құрылыс алаңында болып, жұмыстардың сапасын тексерді. Қазір ғимараттың сырты қапталып, ішкі инженерлік желілер орнатылып, еден құйылуда. Сыртқы желілер жүргізілген, ал нысанды биылғы жазда пайдалануға беру жоспарлануда.

«Жаңа оқу жылында шағын ауданның оқушылары кең әрі заманауи білім беру мекемесінің есігін ашатын болады. Мұнда физика, химия, биология, информатика пәндеріне арналған жаңа модификациядағы сыныптар, STEM-лабораториясы, робототехника сыныптары, интерактивті панельдер, шеберханалар мен кең спорт залдары пайда болады», – деп жазды өңір басшысы әлеуметтік желілерде.

Мұндай заманауи жағдайларда қазір «Орман» шағын ауданында балалар білім алуда, өткен жылы сол жерде жайлы мектеп ашылған еді.