СҚО әкімі Петропавл ЖЭО-2-нің жылыту маусымына дайындығын тексерді

Облыс орталығында жаңа жылыту маусымына дайындық жұмыстары қарқынды жүргізілуде. Солтүстік Қазақстан облысының әкімі Ғауез Нұрмұхамбетов Петропавл ЖЭО-2-дегі жөндеу жұмыстарының барысымен танысып, нысанда көшпелі кеңес өткізді, деп хабарлайды QZ NEWS.

«Жылыту маусымына дайындық Мемлекет басшысының тікелей бақылауында. Президент барлық жөндеу жұмыстарын уақытында аяқтап, жылу және энергиямен жабдықтау жүйелерін жаңғыртуды тапсырды», – деп жазды СҚО әкімі әлеуметтік желідегі парақшасында.

Қазіргі уақытта келесі жұмыстар аяқталған:

• №2 турбоагрегаттың күрделі жөндеуі,
• теміржол жолдарының күрделі жөндеуі,
• №1 және №4 қазан агрегаттарының, сондай-ақ №6 турбоагрегаттың ағымдағы жөндеуі.

Сонымен қатар, №2 қазан агрегатын қайта жаңғырту, №3 және №11 қазан агрегаттарының күрделі жөндеуі, сондай-ақ №6 турбоагрегатты жөндеу жалғасуда. Орындаған жұмыстардың жалпы көлемі 60%-дан асты. Бұл күз-қыс кезеңінде жылудың тұрақты берілуін қамтамасыз етуге тиіс. Жаңа түтін мұржасын іске қосу қыркүйек айының соңына жоспарланған, маусым басында станцияда үш мұржа жұмыс істейтін болады.

«ЖЭО дайындығынан бөлек, көпқабатты үйлердің де дайындығы маңызды. Бұл – басқарушы компаниялар мен меншік иелерінің жауапкершілігінде. Бүгінде 271 көпқабатты үйде жылыту жүйелерін жуу және қысыммен тексеру жұмыстары жүргізілді. Қала әкіміне 15 қыркүйекке дейін барлық дайындық шараларын толық аяқтауды бақылауға алу тапсырылды», – деп атап өтті Ғауез Нұрмұхамбетов.