СҚО-да рақымшылық 209 сотталғанның тағдырын өзгертті
Солтүстік Қазақстан облысында 90-нан астам сотталғанға рақымшылық туралы заңды қолдану нәтижесінде жазасын одан әрі өтеуді жалғастырмауға мүмкіндік берілді. Тағы 100-ден астам адам сот белгілеген мерзімнен бұрын бостандыққа шыға алады. Рақымшылықтың жүзеге асырылу барысы және қылмыстық жазаларды орындау саласындағы өзгерістер туралы СҚО прокуратурасының өкілдері тікелей эфир барысында айтып берді, деп хабарлайды QZ NEWS тілшісі.
Тікелей эфир ведомствоның Instagram желісіндегі ресми парақшасында «Заң және тәртіп» тұжырымдамасын іске асыру аясында өтті. Негізгі тақырыптардың бірі – «Қазақстан Республикасының жаңа Конституциясын қабылдауға байланысты рақымшылық жасау туралы» заң нормаларын қолдану және сотталған әйелдердің құқықтарын сақтау болды.
Жалпы СҚО-да рақымшылық туралы заң 257 адамға қатысты қолданылады. Оларға қатысты материалдар тиісті шешім қабылдау үшін сотқа жолданған. Қазірдің өзінде қаралған 210 істің 93-і бойынша сотталғандарды жазасын одан әрі өтеуден босату туралы шешім қабылданды. Тағы 116 адамның жазаны өтеу мерзімі қысқартылды.
Тікелей эфир барысында прокуратура қызметкерлері қолданушылардың сұрақтарына жауап беріп, заңнамаға енгізілген өзгерістерді түсіндірді. Сотталған әйелдердің құқықтары мен әлеуметтік кепілдіктерін кеңейтуге, сондай-ақ рақымшылықты қолдануға қатысты мәселелерге ерекше назар аударылды.
Эфирге қатысушыларға сот үкімдерінің орындалуына прокурорлық қадағалау жүргізу тәртібі де түсіндірілді. Атап айтқанда, қылмыстық-атқару жүйесі мекемелерінде заңдылықтың сақталуы қалай бақыланатыны, сотталғандар мен олардың туыстарының қандай құқықтары бар екені және қандай жағдайларда прокуратура органдарына жүгіне алатыны айтылды.