Жалпы ұзындығы 2,5 шақырымдық бөгет құм салынған қаптардан тазартылды

«AMANAT» партиясының СҚОФ қызметкерлері, «Жастар рухы» жастар қанатаның белсенділері мен облыстық спорт басқармасының өкілдері «Ойқала» шағын ауданында тұрғызылған бөгеттерді құм салынған қаптардан тазартты, деп хабарлайды QZ Media тілшісі.

Аталған шара «Таза Қазақстан» жалпыұлттық жобасы аясындағы «Таза бейсенбі» экологиялық акциясы шеңберінде өтті. Оған 200-ден астам адам қатысты. Осы сынды тазалау жұмыстары әр апта сайын өткізілетін болады.

«Осы акцияға қатысқан спортшыларға өз алғысымды білдіргім келеді. Мұндай тазалау жұмыстары бөгет басында ғана емес, су тасқыны болған жерлерде де өткізіліп жатыр. Аталған іс-шараға барлық спортшылар бір адамдай қатысты. Менің ойымша, бұл науқанға өңірдің әрбір тұрғыны үн қосуы керек»,- деді «Қызылжар» футбол орталығының жетекшісі Вячеслав Колода.