Тараз бен Алматыдан келген 12 адам Прибрежное ауылында су тасқынынан зардап шеккен үйлерді қалпына келтіруде

Солтүстік Қазақстан облысында ауқымды су тасқынының салдары әлі жойылуда. Басқа қалалардан келген бірсыпыра механикаландырылған бригада аймақ тұрғындарына үйлерін қалпына келтіруге көмектесіп жатыр. Мәселен, маңызды жұмысты Тараз бен Алматыдан келген мехкомандалар жалғастыруда, деп хабарлайды QZ Мedia тілшісі.

Прибрежное ауылының тұрғыны Галина Морозованың үйі табиғи апаттан қатты зардап шекті. Ол онда 40 жылдан астам өмір сүрді. Комиссияның қорытындысы бойынша үй қалпына келтіруге жатады.

“Біз бәрібір жөндеу жұмыстарын өзіміз жасай алмас едік. Зейнет жасындағы адамдармыз. Күйеуім де зейнеткер, мен де зейнеткермін. Ұлымыз бар. Маусым айында үйге кіріп, қабырғаларды ретке келтіре бастадық. Қабырғаға тор тартып, сылай бастадық. Ал содан кейін біз мұнда болмадық, мамандар өздері ғана жұмыс істеді. Анда-санда келіп тұрдық, әр келгенде өзгерісті көреміз. Бәрі жақсы сияқты”, – дейді Галина Морозова.

Үйлерді қалпына келтіру бойынша 12 адам белсенді еңбек етуде. Жоспарға сәйкес, қазіргі уақытта бір тұрғын үй-жайда бұзу және жөндеу жұмыстары жүргізілуде. 8 үйді қалпына келтіру аяқталды.

“Прибрежное ауылында “Жұмашев” ЖК мехбригадасы жұмыс істеп жатыр. Жұмысшылар Тараз бен Алматыдан келді. Біз құрылыс жұмыстарымен, соның ішінде үйлердің сыртқы және ішкі әрлеу жұмыстарымен айналысамыз. Барлық жұмыстар уақытылы және сапалы орындалады. Қазірдің өзінде сегіз үй тапсырылды. Ағымдағы жобалардың бір бөлігі ретінде біз бетон құйып, есіктер мен едендерді ауыстырамыз, сонымен қатар ішкі тұсқағазды желімдейміз. Енді бір ғана үй қалды. Оны тапсырғаннан кейін жұмыс аяқталады”, – деді құрылысшы Жанғали Мұсағалиев.