М. Жұмабаев ауданының тұрғындары аудан орталығы мен ауылдардың аумағын қоқыстан тазартты

“Таза Қазақстан” республикалық экологиялық бағдарламасы аясында М. Жұмабаев ауданында бірден бірнеше эко-акция өтті. Аумақтарды тазартуға еріктілер, мемлекеттік қызметкерлер, ауданның белсенді әрі табиғатқа қамқор тұрғындары шықты, деп хабарлайды QZ News тілшісі.

“Ормандар, су қоймаларының жағалаулары, ауыл көшелері таза болуы керек. Қоршаған ортаны қорғауға бағытталған ортақ іске өз үлесімізді қосайық”, – деп атап өтті М. Жұмабаев ауданының әкімі Рахат Смағұлов.

Аудан орталығының аумақтарын тазартуға Батыр Баян атындағы мектеп-гимназиясының оқытушылары мен оқушылары да қатысты.

“Сүйікті қаламызды абаттандыруға қатысуға шақырамыз. Ортақ күш-жігермен біз қаламызды таза әрі әдемі ете аламыз”, – деді Батыр Баян атындағы мектеп-гимназиясының директоры Жанна Исмахамбетова, М.Жұмабаев ауданы.

“Таза Қазақстан” бағдарламасы аясында М. Жұмабаев ауданында эко-акциялар тұрақты негізде өтуде.

“”Таза Қазақстан” бағдарламасы аясында Таза жағалау және Таза орман экологиялық акциялары өткізілді. Булаев орман шаруашылығы қызметкерлері Булаев қаласының еріктілерімен бірлесіп, орман алқаптары мен су айдындарының жағалауларын қоқыстан тазартты”, – деді М.Жұмабаев ауданының орманшысы Жанат Абаев.

М.Жұмабаев ауданындағы су айдындарының жағалауларын, ормандар мен көшелерді аудан орталығының тұрғындары ғана емес, ауылдық округтер де тазартты.