Аққайың ауданында астықтың жалпы түсімі 409 мың тоннаны құрады

Биыл Аққайың ауданында ауыл шаруашылығы дақылдарын егуге 217 мың гектар жер бөлінді. Дәнді дақылдардың өнімділігі орташа есеппен 24 ц/га, жалпы өнім 409 мың тоннаға жетті. Бұл туралы аудан әкімі Жанар Құсайын брифингте айтты, деп хабарлайды QZ News тілшісі.

«Майлы дақылдардың өнімділігі 14,3 ц/га, жалпы өнімі 43 мың тоннаны құрады. Өсірілген дақылдардың қауіпсіздігін қамтамасыз ету үшін облыста 516 мың тонна көлемінде сақтау қоймалары бар, оның 324 мың тоннасы элеваторларда. 162,1 мың тонна жем дайындалып, өнімділігі 91,6 ц/га құрады. Бір жарым жылдық жем қоры дайындалды», – деді Аққайың ауданының әкімі Жанар Құсайын.

Ауыл шаруашылығы саласындағы жетістіктерге тоқталған Жанар Құсайын облыстағы ауылшаруашылық құрылымдары жыл сайын машина-трактор паркін жаңартып жатқанын жеткізді. Жыл басынан бері 6,1 млрд теңгеге 157 жаңа техника сатып алынды. Ауыл шаруашылығының жалпы өнім көлеміне келсек, биылғы жылдың басынан бері облыста 55,3 млрд теңгеге жетті.