Петропавлда «Есірткісіз болашақ» спектаклінің премьерасы өтті

«Кривое зеркало» студенттік театрының әртістері СҚО ПД есірткі қылмысына қарсы күрес басқармасы қызметкерлерінің және «Ассамлея жастары» РҚБ облыстық өкілдігі белсенділерінің қолдауымен «Есірткісіз болашақ» қойылымын ұсынды. Қозыбаев университетінің студенттері мен оқушылар бүгін туындыны алғаш рет тамашалады, деп хабарлайды QZ News тілшісі.

«Спектакль аз уақыт ішінде қойылды, көрермендерге ұнайды деп сенемін. Сюжет нашақорлықпен күрескен Андрейдің оқиғасына негізделген. Бұл оқиғада Максим нашақорлықтан арыла алмайды. Осыған ұқсас оқиғалар көп кездесіп жатады. Нашақорлық мәселесі өзекті, менің ойымша, бұл мәселені әртүрлі тәсілдермен көрсетуге болады. Мұны өнер арқылы да жасауға болады. Спектакль арқылы тығырықтан шығудың жолы болатынын, білікті көмектің бар екенін көрсеткім келді», – дейді «Кривое зеркало» студенттер театрының жетекшісі Виктория Курышева.

Нашақорлықпен күреске арналған қойылым облыс орталығындағы өзге де оқу орындарында көрсетіледі, дейді «Ассамблея жастары» РҚБ СҚОФ жетекшісі Дариға Смаилова.

«Көрермендердің пікірі біз үшін маңызды, егер жастар жұмысты бағаласа, біз колледждерде спектакльді көрсетеміз. Сонымен қатар, нашақорлықтың алдын алуға байланысты суреттер мен жарнамалық бейнероликтер байқауының қорытындысын шығардық. Оған мектеп оқушылары қатысты, ең креативтілері марапатқа ие болды», – деді Дариға Смаилова.