Туризм және спорт вице-министрі Ержан Еркінбаев Солтүстік Қазақстан облысына демалушыларды тарту бойынша ұсыныстар берд

Қазақстан Республикасы Туризм және спорт вице-министрі Ержан Еркінбаев Солтүстік Қазақстан облысының тұрғындарымен кездесу өткізді. Жиынға тиісті ведомство өкілдері, қоғам қайраткерлері, қала тұрғындары қатысты, деп хабарлайды QZ News тілшісі.

«2024 жылдың қаңтар-қыркүйек аралығында Солтүстік Қазақстан облысына 115 мыңнан астам турист келді. Көрсетілген қызмет көлемі 1,8 млрд теңгені құрады. Облыс бойынша төсек-орын саны 6868 бірлікті құрайды. Имантау-Шалқар курорттық аймағында 3036 орын бар. Облыста жалпы сомасы 9 млрд теңгені құрайтын 21 инвестициялық жоба жүзеге асырылуда. Биыл 525 млн теңгенің 5 инвестициялық жобасы аяқталды. Облыста туризм саласына 41,4 млрд теңге инвестиция тартылды. Туризм саласына негізгі капиталға инвестиция тарту бойынша облыс Қазақстан өңірлері арасында 5-ші орында», – деді ҚР Туризм және спорт вице-министрі Ержан Еркінбаев.

«Солтүстік Қазақстан облысында инвесторлар Имантау-Шалқар курорттық аймағында жыл бойы жұмыс істейтін экоқонақ үйлер мен глэмпингтер салу бойынша 16 жобаны жүзеге асыруға кірісті. Инвестиция көлемі 4,2 млрд теңгені құрайды. Демалушылардың қауіпсіздігін қамтамасыз ету үшін Шалқар және Имантау көлдерінде 2 судан құтқару бекеті салынады. Лобаново ауылынан Ақмола облысының шекарасына дейін туристерге жайлылық пен қолжетімділікті қамтамасыз ететін асфальт жабыны пайда болды. Биыл қосалқы станция мен электр желілерін тартудың жобалық-сметалық құжаттамасын әзірледік. Курорттық аймақ ұлғаюда, электр энергиясына деген қажеттілік артуда», – деді Солтүстік Қазақстан облысы әкімінің орынбасары Рүстем Құрманов.

ҚР Туризм және спорт вице-министрі Ержан Еркінбаевтың айтуынша, Имантау-Шалқар курорттық аймағын дамытуға шетелдік инвесторларды тарту керек. Сонымен қатар, ол солтүстік өңірдің сұлулығын тамашалағысы келетін демалушыларды тартуға ауылдық жерлерде туристік нысандарды құру қажеттігіне назар аударды.