Қозыбаев университетінде шетелдік биотехнологтар студенттерге дәріс береді

Қозыбаев университеті мен Аризона университетінің халықаралық кампусына сабақ беруге шетелден ғалымдар келді, деп хабарлайды QZ News тілшісі.

Университеттің баспасөз қызметінің хабарлауынша, Дмитрий Берилло мен Андреа Зукколо биотехнология саласындағы қос дипломдық бағдарлама бойынша оқып жатқан студенттерге дәріс береді. Олардың келгеніне 3 жыл болды.

Андреа Зукколо – Италиядан келген профессор. Оның еңбек жолы: Пиза итальяндық университеті, КАУСТ университеті (Сауд Арабиясы), Аризона университеті (АҚШ). Профессор Зукколо біздің ғалымдармен бірге тек білім беру қызметімен ғана емес, ғылыммен де айналысады. Оның ғылыми бағыты – геномика және биоинформатика.

Сондай-ақ студенттерге биотехнологиядан доцент, PhD докторы Дмитрий Берилло дәріс береді. Оның зерттеулерінің негізгі векторы регенеративті медицинаның әртүрлі мәселелерін шешуге көмектесетін әртүрлі тіндік инженерия тапсырмалары мен криогельдер үшін ковалентті емес көлденең байланысқан макропористы гидрогельдерді жасау болды.

Өсімдіктер геномикасы бойынша маманданған болашағы зор биоинформатика ғалымы Сәуле Муссорова да Қытайдың Солтүстік-Батыс ауыл шаруашылығы және орман шаруашылығы университетімен бірге университет жанынан ашылған Агробіліктілік орталығына жұмысқа қабылданды. Ол «Болашақ» және «Талап» стипендиясының иегері. Лондон университеттік колледжінде және Шығыс Англия университетінде (Ұлыбритания) білім алған. Қазіргі уақытта KAUST университетінде (Сауд Арабиясы) өсімдіктану бойынша PhD дәрежесін алуда.