Петропавлда жеке сектордағы ауладан қар шығару бойынша сенбіліктер басталады

Өткен жылдан бастап облыс орталығының әкімдігі кешенді су тасқынына қарсы шараларды жүзеге асырып келеді. Бөгеттер мен топырақ үйінділерін салумен қатар, біз жеке сектордағы ауладан қар шығару және қала бойынша жаңбыр суы кәріздерін тазалау бойынша сенбіліктер ұйымдастыратын боламыз. Бұл туралы қала әкімінің орынбасары Сергей Мелехов хабарлады, деп жазады QZ News.

Жұмыстар Жұмысшы кенті мен Береке шағынауданынан басталады, себебі бұл аумақтар еріген судың әсеріне көбірек ұшырайды.

«Тұрғындар өз ауласын тазалап, қарды жол бойына жинап қоюы қажет. Коммуналдық қызметтер оны шығарады. Жеке секторда көп қарт адамдар тұрады, оларды да назардан тыс қалдырмаймыз. Қажет болған жағдайда олардың аулаларын қардан тазалауға көмек ұйымдастырамыз», – деп хабарлады.