Евней Бөкетовтың ғылымға қосқан үлесі: Петропавлда ғалымның 100 жылдығына арналған дөңгелек үстел өтті
Kozybayev University қабырғасында «Еліміздің көрнекті ғалымы» атты дөңгелек үстел өтті. Ол белгілі ғалым, ғылым қайраткері, Ұлттық ғылым академиясының академигі Евней Арстанұлы Бөкетовтың 100 жылдығына арналды, деп хабарлайды QZ News.
Евней Арстанұлы Бөкетов – химия және металлургия саласындағы қазақстандық ғалым, жазушы, ақын, Қазақ КСР Ғылым академиясының академигі, техника ғылымдарының докторы, профессор, КСРО Мемлекеттік сыйлығының лауреаты (1969), КСРО Жазушылар одағының мүшесі. Евней Бөкетов 1925 жылы 23 наурызда қазіргі Солтүстік Қазақстан облысының Шал ақын ауданындағы Бағанаты ауылында шаруа отбасында дүниеге келген. Имам оған Ибн-Ғабиден есімін бергенімен, ата-анасы Ебней-Ғабиден деп атап кеткен, ал ресми құжаттарда Евней болып жазылған.
20 жасында мектеп бітіру емтихандарын тапсырып, Қазақ тау-кен металлургия институтының металлургия факультетіне оқуға түсіп, 1950 жылы бітіріп шықты. Ғылыми және қызметтік жолы сәтті өрбіді:
1954 жылы кандидаттық диссертация қорғады,
1956 жылы доцент атанды,
1958 жылы оқу ісі жөніндегі проректор болып тағайындалды,
1960 жылы Қазақстан Ғылым академиясының Қарағандыдағы Химия-металлургия институтының директоры болып қызмет атқарды.
Ғалым 200-ден астам ғылыми еңбек, 9 монография, 90-ға жуық өнертабыстың авторы. Оның зерттеулері металлургиялық процестерді жеделдетуге бағытталған. АҚШ, Канада, Австралия, Швеция, Финляндия, Жапония және басқа елдерде патенттелген өнертабыстары бар.
Ғалым 58 жасында өмірден өтті. Оның есімі Қарағанды мемлекеттік университетіне берілген. Университет жанында Е.Бөкетов атындағы мемориалдық мұражай жұмыс істейді. Қазақстанның көптеген қалаларында оның есімімен аталған көшелер бар.
Kozybayev University баспасөз қызметінің хабарлауынша, дөңгелек үстел барысында студенттер баяндама жасап, Евней Бөкетовтың ғылым мен мәдениет арасындағы ерекше тұлға екенін атап өтті. Ол түсті металлургия, экология, металл технологиясы саласындағы зерттеулерімен қатар, Қазақстанда жоғары білімді дамытудағы рөлі мен әдеби мұрасы жөнінде де құнды еңбектер қалдырды.