Қазақстандықтар өз деректерінің таралуын тексере алады

Қазақстандықтар жеке деректерінің таралу мүмкіндігін өз бетінше бақылауға мүмкіндік алды. Бұл қызмет eGov Mobile платформасында іске қосылған Nomad Guard сервисінің көмегімен жүзеге асырылады, деп хабарлайды QZ News NewTimes.kz агенттігіне сілтеме жасап.

Аталған сервис пайдаланушыларға өзара әрекеттесетін сайттар мен сілтемелерді тексеру арқылы ықтимал қауіптерді талдауға мүмкіндік береді. Тексеру үшін eGov Mobile қосымшасына кіріп, авторизациядан өту, «Басқа сервистер» бөліміне өтіп, «Тексеру» опциясын таңдап, сайттың мекенжайын немесе сілтемені енгізіп, «Жіберу» батырмасын басу қажет.

«Сұраудың мәртебесі «Менің тексерулерім» бөлімінде көрсетіледі. Егер деректердің таралуы анықталса, сервис зардап шеккен ресурстар мен таралған ақпарат көлемін көрсетеді. Пайдаланушы нақты жазбалар санына басу арқылы толық ақпарат ала алады», – деп хабарлады «Ұлттық ақпараттық технологиялар» АҚ.

Сондай-ақ, «Алаяқтық» бөлімінде күмәнді сайттар немесе әрекеттер туралы арнайы форманы толтырып хабарлауға болады.

Жуырда eGov Mobile қосымшасында жүргізілген сауалнама нәтижесінде 50 мыңнан астам респонденттің 53%-ы интернетте жеке деректері тараған жағдайда қайда жүгіну керектігін білмейтінін мойындаған. Тек 18%-ы мұндай жағдайларда не істеу керектігін нақты білетінін айтты. Респонденттердің 62%-дан астамы фишингтік сілтемелердің не екенін түсінбейді — бұл интернет-алаяқтардың негізгі құралдарының бірі. Әр бесінші ғана адам фишингті шынайы сайттардан ажырата алады. Респонденттердің 92%-ы SMS арқылы келген кодтарды «банк қызметкерлеріне» бермейтінін айтқанымен, 8%-ы мұндай қателікке жол беруі мүмкін. 31% пайдаланушы ешқашан құпиясөздерін өзгертпейтінін, ал 51% тек қиындықтар туындағанда ғана ауыстыратынын мәлімдеген. Респонденттердің жартысынан көбі күмәнді хабарламалармен бетпе-бет келген.