Ғауез Нұрмұхамбетов «Sensitive» театрының жетекшісі Ольга Ростовщиковамен кездесті

Облыс әкімі Ғауез Нұрмұхамбетов есту қабілеті нашар бишілердің бірегей «Sensitive» театрының жетекшісі Ольга Ростовщиковамен кездесті. Кездесу Қытайда өткен байқауда ұжымның жеңіске жетуіне орай өтті, деп хабарлайды QZ News.

«Sensitive» байқауда Қазақстан атынан өнер көрсеткен жалғыз ұжым болды. Бұл жай ғана жеңіс емес — бұл рухтың мықтылығы, күн сайын кедергілерді еңсеріп, өзгелерге үлгі бола білген адамдардың тарихы.

«Ольга Николаевнамен ерекше қажеттіліктері бар балаларды қолдау мәселесін талқыладық. Оның ұжымы жасап жатқан іс — баға жетпес еңбек, жетістіктеріне шын жүректен тәнтімін. Олар тек би үйретіп қана қоймай, балаларға жаңа әлемнің есігін ашып, өзіне деген сенімділік ұялатып, таланттарын ашып, қоғамдағы шектеулерді бұзады. Сіздер өнердің шекарасы жоқ екенін, ал сенім мен табандылықтың нағыз ғажайыптарға жол ашатынын дәлелдедіңіздер», — деп жазды өңір басшысы.