СҚО-да шомылу маусымына дайындық жүріп жатыр: қауіпсіздік шаралары күшейтілді, алайда қауіптер сақталуда
Облыс аумағында шамамен 60 өзен, 2000-нан астам көл және 127 котлован бар. Олардың ішінде ең қауіпті су айдындарына Есіл өзені, Пестрое, Тұзды, Лебяжье, Үлкен Таранғұл, Шалқар және Имантау көлдері жатады. Шомылу маусымының жақындауына байланысты СҚО Төтенше жағдайлар департаменті өңірдегі су айдындарында халықтың қауіпсіздігін қамтамасыз ету мақсатында кешенді шаралар қабылдауда. Бұл туралы облыс әкімдігінде өткен жиында департамент басшысы Жомарт Асқаров мәлімдеді, деп хабарлайды QZ News.
Облыс бойынша 13 су айдынында жаппай демалуға арналған 60 ресми орын белгіленген. Оның 6-уы коммуналдық меншікке тиесілі болса, 54-і жеке кәсіпкерлерге жалға берілген. Алайда алты ауданда мұндай демалыс орындары мүлде жоқ, бұл өз кезегінде судағы оқиғалар қаупін едәуір арттырады.
2025 жылғы шомылу маусымына дайындық аясында ТЖД күштері мен құралдары толық дайындыққа келтірілді. Соңғы үш жылда республикалық және жергілікті бюджет есебінен заманауи құрал-жабдықтар сатып алынды. Атап айтқанда, гидроцикл, көпфункционалды «Марлин» катері, 2 металл және 6 үрлемелі қайық, 17 қайық моторы алынған. Барлығы 25 жүзу құралы, оларды тасымалдауға арналған 3 тіркеме және 8 техника бірлігі дайындалды.
«Су айдындарында адамдардың қауіпсіздігін қамтамасыз ету бойынша іс-шаралар жоспары әзірленіп, жүзеге асырылуда. Ауа райы ыстық болған жағдайда аса қауіпті су айдындарына қосымша 5 мобильді бекет орнату жоспарланып отыр. Азаматтарды бақылау және хабардар ету үшін дауыс зорайтқыштар мен бейнекамералармен жабдықталған пилотсыз ұшу аппараттары (дрондар) белсенді түрде қолданылуда. Су тасқыны кезеңіндегідей, Есіл өзені бойымен дрондар арқылы патруль жүргізіліп, нақты уақытта бейнебақылау жүзеге асырылады», – деді Жомарт Асқаров.
Жастар ұйымдары, полиция және әскери қызметкерлердің қатысуымен бірлескен профилактикалық шаралар өткізілуде. Әкімшілік құқық бұзушылық туралы кодекстің 364, 440 және 412-баптары бойынша әкімшілік шаралар қолданылуда. Биылғы жылдың басынан бері су айдындарындағы қауіпсіздік ережелерін бұзғаны үшін 412-баппен 5 адам әкімшілік жауапкершілікке тартылды.
Барлық қабылданып жатқан шараларға қарамастан, статистика алаңдатарлық күйде қалып отыр: соңғы бес жылда облыста 46 адам суға батып кеткен, оның ішінде 10 бала бар. 2024 жылы республика бойынша 162 адам суға кеткен, оның 50-і – балалар. Бұл қауіп деңгейінің әлі де жоғары екенін көрсетеді.
Өңір басшысы Ғауез Нұрмұхамбетов өз кезегінде шомылуға арналмаған және қауіпті су айдындарында тыйым салатын және ескерту белгілерін, ақпараттық стендтерді орнатуды тапсырды. Сондай-ақ мұндай учаскелерде мобильді бекеттер ұйымдастырып, жабдықталған жаппай демалыс орындарының санын арттыру бойынша жұмыс жүргізуді жүктеді.