СҚО-да жұмысшы мамандықтар бойынша «Кәсіби маман» байқауына өтінім қабылдау басталды

Солтүстік Қазақстан облысында ҚР Ұлттық кәсіпкерлер палатасы «Атамекеннің» бастамасымен ұйымдастырылған «Кәсіби маман» республикалық байқауының өңірлік іріктеу кезеңіне қатысу үшін өтінім қабылдау басталды. Іс-шара Жұмысшы мамандықтар жылы аясында өткізіліп, кадр даярлау мен тәлімгерлік бойынша үздік тәжірибелерді анықтауға бағытталған, деп хабарлайды QZ News

«Кәсіби маман» байқауының мақсаты – жұмысшы мамандықтарды дамытуға елеулі үлес қосып жүрген кәсіпорындарды, колледждерді және жекелеген мамандарды атап өту. Байқау аясында Қазақстанда жұмысшы кадрларды даярлаудың үздік тәжірибелерін анықтап, қолдау көзделеді», – деді СҚО кәсіпкерлер палатасының адами капиталды дамыту бөлімінің басшысы Ирина Торопова.

Байқау үш номинация бойынша өтеді:

• «Кадр даярлауға қатысушы үздік кәсіпорын»
• «Жұмысшы кадрларды даярлайтын үздік колледж»
• «Өндірістегі үздік тәлімгер»

Байқау екі кезеңнен тұрады: өңірлік және республикалық деңгейде өткізіледі.

Қатысушылардан өтінім қабылдау бүгін, 2 маусымда басталып, 12 маусымға дейін жалғасады. Құжаттар (өтінім, E-портфолио және растайтын құжаттарға сілтеме) электронды түрде келесі мекенжайға жолдануы қажет: petropavl@atameken.kz

Өңірлік кезеңнің қорытындысын шығару және өтінімдерді қарау 16-20 маусым аралығында өтеді.

Өңірлік кезең жеңімпаздары қатысатын республикалық кезең қыркүйек-қазан айларына жоспарланған. Дәл осы кезеңде байқаудың Гран-при иегері анықталады.

СҚО кәсіпкерлер палатасы кәсіпорындар мен колледждерді, сондай-ақ өндірістік тәлімгерлерді байқауға белсенді қатысуға шақырады. Толық ақпарат пен байқау ережесін мына телефон нөмірі арқылы алуға болады: 8 (7152) 50-36-42.