Kozybayev University «САПАЛЫ БІЛІМ – ҰЛТ БОЛАШАҒЫ» тақырыбында облыстық педагогтар форумы

Kozybayev University СҚО білім басқармасымен бірлесе отырып «САПАЛЫ БІЛІМ – ҰЛТ БОЛАШАҒЫ» атты Педагогикалық форум өткізді. Форум өңірдің білім беру саласындағы үздік мамандарын жинап, педагог мамандығының беделін арттыру, білім беру саласындағы өзекті мәселелерді талқылау, педагог кадрларын даярлау және кәсіби қауымдастықты дамыту мақсатында ұйымдастырылды, деп хабарлайды QZ News.

Университеттің баспасөз қызметінің мәліметінше, форумға Ы.Алтынсарин атындағы Ұлттық білім академиясының өкілдері, өңірлік білім бөлімдерінің басшылары, мектептер мен балабақшалардың директорлары, Аризона университетінің профессоры, ардагер ұстаздар, оқытушылар мен кәсіби бағдар мамандары қатысты.

«Мемлекет басшысы Қазақстан халқына Жолдауында білім беру саласының, әсіресе, білікті педагог даярлаудың маңыздылығын бірнеше рет атап өтті. Ол білімді, еңбекқор, отансүйгіш ұрпақ тәрбиелеу – бәрімізге ортақ міндет екенін айтты. Бұл ойлар 2023–2029 жылдарға арналған Қазақстан Республикасының даму тұжырымдамасында нақты көрініс тапқан. Онда: білім сапасы педагог кадрлардың дайындығына тікелей байланысты екені атап көрсетілген», – деді Басқарма төрағасы – Ректор Ербол Исақаев.

Сондай-ақ форум аясында өңірдің білім беру жүйесінің дамуына сүбелі үлес қосқан педагогика саласының ардагерлері, СҚО білім бөлімдерінің қызметкерлері мен дарынды студенттер марапатталды.

«Бұл форум – балабақшадан бастап мектеп, облыстық оқу орындарына дейінгі барлық білім беру деңгейлерін біріктіріп, ұстаздық кәсіптің маңыздылығы мен қоғамдағы рөлін талқылауға арналған алаң. Сонымен қатар түлектерімізді педагогикалық мамандықты дұрыс таңдауға бағыттау жолдары да қозғалды», – деді СҚО білім басқармасының басшысы Айнагүл Сұрағанова.

Форум аясында педагогикалық мамандықтар бойынша түлектерге арналған бос жұмыс орындары жәрмеңкесі ұйымдастырылды. Қазіргі таңда университетте 41 педагогикалық білім беру бағдарламасы бойынша бакалавриат пен магистратурада 2270-тен астам студент білім алуда. Биыл олардың 492-сі оқуын аяқтамақ. Жәрмеңкеде олар жұмыс берушілермен кездесіп, бос орындар мен жұмыс шарттары жайлы ақпарат алып, түйіндемелерін тапсыру мүмкіндігіне ие болды. Іс-шараға облыстың 13 ауданынан мектептер мен 24 техникалық және кәсіптік білім беру ұйымы қатысты. Сонымен қатар, «Мен – кәсіби бағдар маманымын» атты курсты аяқтаған 93 маманға Kozybayev University-дің сертификаттары табысталды.