Петропавл қаласындағы NIS «Туған елге тағзым» жобасының қатысушылары келді

Алматы, Орал және Түркістан қалаларындағы Назарбаев Зияткерлік мектептерінің оқушылары республикалық «Туған елге тағзым» жобасына қатысу үшін Петропавлдағы NIS-ке келді. Бұл дәстүрлі жоба аясында оқушылар Солтүстік Қазақстан облысы бойынша өлкетану-зерттеу экспедициясын өткізеді, деп хабарлайды QZ News.

Қонақтарды Петропавл қаласының теміржол вокзалы мен әуежайында қарсы алды. Бір апта бойы қатысушыларды экскурсиялар, кездесулер, тарихи орындар мен өңір мұражайларына баруды қамтитын мазмұнды бағдарлама күтеді.

«Туған елге тағзым» жобасы оқушыларға Қазақстанның түрлі өңірлерінің тарихы, мәдениеті мен табиғатын тереңірек тануға, зерттеушілік қабілеттерін дамытуға және туған еліне деген мақтаныш сезімін нығайтуға бірегей мүмкіндік береді.