СҚО-да жазғы лагерьлерде алты мыңнан астам бала демалады деп жоспарлануда

Солтүстік Қазақстан облысында жазғы сауықтыру маусымына дайындық қызу жүріп жатыр. Биыл жазда облыстағы 10 қала сыртындағы лагерьде 6200 бала демалады деп жоспарлануда, деп хабарлайды QZ News СҚО білім басқармасына сілтеме жасап.

10 лагерьдің 9-ы СҚО аумағында орналасқан болса, біреуі — Тайынша ауданындағы «Эдельвейс Бурабай» лагері — Ақмола облысында орналасқан. Сауықтыру лагерьлері Қызылжар, Есіл, Жамбыл, Ғабит Мүсірепов, Шал ақын, Мағжан Жұмабаев, Аққайың және Тайынша аудандарында жұмыс істейді. Петропавл қаласында екі лагерь бар. Айыртау, Ақжар, Уәлиханов, Тимирязев және Мамлют аудандарында сауықтыру лагерьлері жоқ екені атап өтілді.

«Биыл жазда ұзақтығы 7–10 күн болатын бес сауықтыру маусымы жоспарланған. Балаларды лагерьге қабылдау орташа тәуліктік ауа температурасы бес күн қатарынан +16°C-тан төмен болмаған жағдайда ғана рұқсат етіледі. Балаларға күніне бес мезгіл тамақтану ұйымдастырылады. Мемлекеттік лагерьлердегі жолдама құны орта есеппен 35 мың теңгені, ал сенімгерлік басқаруға берілген лагерьлерде 60 мың теңгені құрайды. Жолдамаларды сатып алуға түрлі көздерден қаржыландыру қарастырылған», — делінген СҚО білім басқармасының хабарламасында.

Бұдан бөлек, ауылдық жерлерден келген 5–8 сыныптың 210 оқушысы «Қазақстан халқына» қоры есебінен «Жаздық жолдама» жобасы аясында Ақмола облысындағы «Парус» сауықтыру лагерінде тегін демалады. Сондай-ақ 96 бала республикалық «Балдаурен» орталығына, 20 бала — «Бөбекке», ал 180 оқушы — Ақмола облысындағы «Чайка» лагеріне жолдама алады.