«Жұмысшы мамандықтар жылы»: СҚО кадр тапшылығы мәселесін қалай шешуде
Солтүстік Қазақстан облысында білім сапасын арттыруға бағытталған жаңа мүмкіндіктер жасалып жатыр. СҚО әкімі Ғауез Нұрмұхамбетовтің Қазақстан Президенті Қасым-Жомарт Тоқаевқа берген есебіне сәйкес, ұлттық жобалар аясында заманауи білім беру нысандары салынуда, сондай-ақ білікті жұмысшы кадрларды даярлауға ерекше көңіл бөлініп отыр. Бұл – 2025 жылдың Жұмысшы мамандықтар жылы болып жариялануына байланысты өзекті бағыт, деп хабарлайды QZ NEWS.
Облыс орталығында заманауи талаптарға сай 600 орындық мектеп салынды. Тағы бір білім ошағы осы жылы ашылуға дайындалып жатыр. Ал «Жас Өркен» шағын ауданында 280 орындық балабақша құрылысы жүргізілуде.
«Жұмысшы кадрлардың жетіспеушілігі мәселесін шешу үшін СҚО-да жергілікті кәсіпорындармен әріптестік кеңейіп келеді. 2025 жылы маман даярлауға арналған мемлекеттік тапсырыстың үлесі 39%-дан 45%-ға дейін ұлғайтылады. Сонымен қатар, дуалды оқытумен қамту көрсеткіші 27%-ды құрайды. Қазіргі таңда жұмысшы мамандықтар бойынша шамамен 4 мың студент білім алуда. Кәсіпорындармен өзара байланыс алғашқы нәтижесін беріп жатыр. Мысалы, «Радуга» ЖШС мемлекеттік тапсырыс аясында Бескөл мектебі-колледжінің базасында оқыту жүргізіп, бизнес қажеттілігіне сай мамандар дайындауда. Бұл шаралар алдағы үш жыл ішінде өңірдегі білікті кадр тапшылығын айтарлықтай азайтуға сеп болады», – деді Ғауез Нұрмұхамбетов.