Петропавл ботаникалық бағында банан ағашы жеміс берді

Петропавл ботаникалық бағы өнім жинауға дайындалып жатыр. Өңірдің қатал солтүстік климатына қарамастан, мұндағы мамандар экзотикалық өсімдіктерге де қолайлы жағдай жасап отыр. Мұнда банан ағашы жеміс берді, деп хабарлайды QZ NEWS тілшісі.

Көпшілігіміз банандарды сары түсті, сопақша, пальма ағаштарында өседі деп елестетеміз. Алайда, ботаникалық бақтың директоры Артур Рязаповтың айтуынша, банан – ағаш емес, биіктігі бамбукқа жететін банан шөбі деп аталатын өсімдікте өседі. Тағы бір қызығы – банан біз ойлағандай жеміс емес, шын мәнінде – жидек. Ботаниктер мұны оның шырынды жұмсағы мен ішіндегі көп мөлшердегі тұқымдарымен түсіндіреді.

– Банандардың пішіні әртүрлі болуы мүмкін: үлкен де, кіші де, жартыай тәрізді, домалақ не сопақ. Біз көбіне сары түсті банандарды білеміз, ал шын мәнінде қызарып піскен түрлері де бар. Сондықтан бұл – өте ерекше өсімдік, – дейді бақ директоры Артур Рязапов.

Банан өсімдігі Оңтүстік-Шығыс Азия, Тынық және Үнді мұхиттарының аралдары, Австралияның солтүстігі мен шығысы секілді экзотикалық аймақтардан таралған. Солтүстік Қазақстан секілді климаттық жағынан мүлде қарама-қарсы өңірде бананның жеміс беруі – таңғаларлық жағдай. Мұның бәрі – бақта жасалған нағыз тропикалық жағдайдың арқасы. Қазіргі таңда бананында гүл шоғыры пайда болған. Бақ директорының айтуынша, бес-алты айдан кейін мамандар көптен күткен жемісті жинап алатын болады.