Тайыншада бұрынғы ерлі-зайыптылар үй мен мотоблок мәселесін өзара шешті

Тайынша аудандық соты ортақ мүлікті бөлуге қатысты азаматтық істі қарады. Тараптар дау-жанжалды сотқа жеткізбей, өзара келісімге келіп, татуласу келісімін бекітті, деп хабарлайды QZ News.

Іс материалдарына сәйкес, бұрынғы ерлі-зайыптылар некеде тұрған кезде Тайынша қаласынан жер телімімен бірге тұрғын үй сатып алған. Талапкер бұл мүлікті өзіне қалдыруды сұрады, себебі оның жеке тұрғын үйі жоқ және қазіргі уақытта ата-анасымен бірге тұрады.

Істі дайындау барысында тараптар дауды бейбіт жолмен шешуге дайын екендіктерін білдірді. Нәтижесінде, сот бекіткен татуласу келісіміне қол қойылды. Келісім шарттарына сәйкес, талапкер жауапкерге ортақ мүліктегі үлесі үшін 2 500 000 теңге көлемінде өтемақы төлеуге міндеттелді.

«Өз кезегінде үй, жиһаз және мотоблок талапкердің толық меншігіне өтеді. Жауапкер толық соманы алғаннан кейін 7 күн ішінде үйді босатуға міндеттенді. Екі тарап та татуласу шарттарымен келісті, талапкер бастапқы талаптарынан бас тартты. Мемлекеттік баж талапкерге қайтарылды», – делінген хабарламада.