Петропавлда гидравликалық сынақ мерзімдері өзгерді
«Петропавл жылу желілері» ЖШС қаладағы жылу желілеріне жүргізілетін гидравликалық сынақтардың мерзімі өзгергенін хабарлады. Бұл туралы ақпаратты «Севказэнерго» АҚ-ның баспасөз қызметі таратты, деп хабарлайды QZ NEWS.
Жаңа мерзім: 2025 жылғы 18–24 тамыз аралығы. Осы кезеңде облыс орталығында ыстық су уақытша өшіріледі.
«Бұл сынақтар алдағы жылыту маусымына дейін құбырлардың беріктігін тексеріп, мүмкін болатын ақауларды анықтау үшін қажет. Тексеру барысында жүйедегі қысым қалыпты мөлшерден 25% артық болады, ал су температурасы +40°C-тан аспайды. Жөндеу жұмыстары аяқталғаннан кейін ыстық су кезең-кезеңімен қайта қосылады. Егер қандай да бір аумақта зақым табылса, сол жердегі үйлерге су беру жөндеу аяқталғанға дейін тоқтатылады», – делінген хабарламада.